chaudah sau sal ka hai farq dikhane ke liye

chaudah sau saal kā hai farq dikhāne ke liye

aap to ab bhī haiñ maujūd zamāne ke liye

hukm-e-rab hogā ki le jaao ise dozaḳh meñ

ā.eñge hashr meñ sarkār bachāne ke liye

'ishq-e-ahmad kī ridā oḌh ke maiñ soyā huuñ

ai farishto mujhe mat aanā uThāne ke liye

tishna-lab dekh ke sarkār kaheñge mujh se

baiTho mañgvā.eñ tumheñ jaam pilāne ke liye

vo bhī mujh jaise gunah-gār ko dozaḳh se bhalā

kaun aa.egā sivā un ke bachāne ke liye

'arsh-e-ā'zam pe hai sarkār tumhārī dā'vat

is liye aa.e haiñ jibrīl bulāne ke liye

mere sarkār faqat itnī navāzish kar do

dar pe aa jā.ūñ kabhī naa't sunāne ke liye

is liye paḌhtā huuñ maiñ naa't nabī kī 'shākir'

apnī soī huī taqdīr jagāne ke liye

chaudah sau sal ka hai farq dikhane ke liye

aap to ab bhi hain maujud zamane ke liye

hukm-e-rab hoga ki le jao ise dozaKH mein

aaenge hashr mein sarkar bachane ke liye

'ishq-e-ahmad ki rida oDh ke main soya hun

ai farishto mujhe mat aana uThane ke liye

tishna-lab dekh ke sarkar kahenge mujh se

baiTho mangwaen tumhein jam pilane ke liye

wo bhi mujh jaise gunah-gar ko dozaKH se bhala

kaun aaega siwa un ke bachane ke liye

'arsh-e-a'zam pe hai sarkar tumhaari da'wat

is liye aae hain jibril bulane ke liye

mere sarkar faqat itni nawazish kar do

dar pe aa jaun kabhi na't sunane ke liye

is liye paDhta hun main na't nabi ki 'shakir'

apni soi hui taqdir jagane ke liye