اپنے قلم سے پہلے میں حمد خدا لکھوں
اپنے قلم سے پہلے میں حمد خدا لکھوں
پھر اس کے بعد مدحت خیرالوریٰ لکھوں
یٰسیں لکھوں مزمل و شمس الضحیٰ لکھوں
ذات خدا کا تم کو پھر اک آئنہ لکھوں
معمور کائنات ہے حسن و جمال سے
حیران ہوں میں شاہ مدینہ کو کیا لکھوں
کوئی فضیلتوں میں نہیں مثل آپ کے
پھر کیوں نہ آپ کو میں شہ انبیا لکھوں
اللہ جس کو خود پڑھے اور ہم کو حکم دے
میں اس درود پاک کا کیا مرتبہ لکھوں
والیل جس کی زلف ہے والشمس جس کا رخ
اس پیکر جمال کا کیا تذکرہ لکھوں
یہ حد بھی لازمی ہے تری مدح کے لیے
تجھ کو عظیم لکھوں تو بعد خدا لکھوں
لکھنے کا حق ادا تو تبھی ہوگا اے جمیلؔ
پڑھ کر درود نعت شہہ مصطفیٰ لکھوں
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.
