marsiya-e-mirza-ghaalib

marsiya-e-mirzā-ġhālib

kyā kahūñ hāl-e-dard-e-pinhānī

vaqt kotāh o qissa tūlānī

'aish-e-duniyā se ho gayā dil sard

dekh kar rang-e-'ālam-e-fānī

kuchh nahīñ juz tilism-e-ḳhvāb-o-ḳhayāl

gosha-e-faqr bazm-e-sultānī

hai sarāsar fareb-e-vahm-o-gumāñ

tāj-e-faġhfūr o taḳht-e-ḳhāqānī

be-haqīqat hai shakl-e-mauj-e-sarāb

jām-e-jamshed rāh-e-raihānī

lafz-e-muhmal hai nutq-e-ā'rābī

harf-e-bātil hai 'aql-e-yūnānī

ek dhokā hai lahn-e-dā.ūdī

ik tamāsha hai husn-e-kan'ānī

na karūñ tishnagī meñ tar lab-e-ḳhushk

chashma-e-ḳhizr kā ho gar paanī

luuñ na ik musht-e-ḳhāk ke badle

gar mile ḳhātam-e-sulemānī

bahr-e-hastī ba-juz sarāb nahīñ

chashma-e-zindagī meñ aab nahīñ

jis se duniyā ne āshnā.ī kī

us se āḳhir ko kaj-adā.ī kī

tujh pe phūle koī 'abas ai 'umr

tū ne kī jis se bevafā.ī kī

hai zamāna vafā se begānā

haañ qasam mujh ko āshnā.ī kī

ye vo be-mehr hai ki hai is kī

sulh meñ chāshnī laḌā.ī kī

hai yahāñ hazz-e-vasl se mahrūm

jis ko tāqat na ho judā.ī kī

hai yahāñ hifz-e-vaz' se māyūs

jis ko 'ādat na ho gadā.ī kī

ḳhanda-e-gul se be-baqā-tar hai

shaan ho jis meñ dil-rubā.ī kī

jins-e-kāsid se nāravā-tar hai

ḳhūbiyāñ jis meñ hoñ ḳhudā.ī kī

baat bigḌī rahī-sahī afsos

aaj ḳhāqānī o sanā.ī kī

rashk-e-'urfī o faḳhr-e-tālib murd

asadullāh ḳhaan ġhālib murd

bulbul-e-hind mar gayā haihāt

jis kī thī baat baat meñ ik baat

nukta-dāñ nukta-sanj nukta-shanās

pāk-dil pāk-zāt pāk-sifāt

shaiḳh aur bazla-sanj shoḳh-mizāj

rind aur marja'-e-kirām o siqāt

laakh mazmūn aur us kā ek ThiThol

sau takalluf aur us kī sīdhī baat

dil meñ chubhtā thā vo agar ba-masal

din ko kahtā din aur raat ko raat

ho gayā naqsh dil pe jo likkhā

qalam us kā thā aur us kī davāt

thiiñ to dillī meñ us kī bāteñ thiiñ

le chaleñ ab vatan ko kyā sauġhāt

us ke marne se mar ga.ī dillī

ḳhvāja nausha thā aur shahr barāt

yaañ agar bazm thī to us kī bazm

yaañ agar zaat thī to us kī zaat

ek raushan dimāġh thā na rahā

shahr meñ ik charāġh thā na rahā

dil ko bāteñ jab us kī yaad aa.eñ

kis kī bātoñ se dil ko bahlā.eñ

kis ko jā kar sunā.eñ she'r-o-ġhazal

kis se dād-e-suḳhanvarī paa.eñ

marsiya us kā likhte haiñ ahbāb

kis se islāh leñ kidhar jaa.eñ

past-mazmūñ hai nauha-e-ustād

kis tarah āsmāñ pe pahuñchā.eñ

log kuchh pūchhne ko aa.e haiñ

ahl-e-mayyat janāza Thahrā.eñ

lā.eñge phir kahāñ se 'ġhālib' ko

sū-e-madfan abhī na le jaa.eñ

is ko agloñ pe kyoñ na deñ tarjīh

ahl-e-insāf ġhaur farmā.eñ

qudsī o saa.ib o asiir o kalīm

log jo chāheñ un ko Thahrā.eñ

ham ne sab kā kalām dekhā hai

hai adab shart muñh na khulvā.eñ

ġhālib-e-nukta-dāñ se kyā nisbat

ḳhaak ko āsmāñ se kyā nisbat

nasr husn o jamāl kī sūrat

nazm ġhunj o dalāl kī sūrat

tahniyat ik nashāt kī tasvīr

tā'ziyat ik malāl kī sūrat

qaal us kā vo aa.ina jis meñ

nazar aatī thī haal kī sūrat

us kī taujīh se pakaḌtī thī

shakl-e-imkāñ muhāl kī sūrat

us kī tāvīl se badaltī thī

rang-e-hijrāñ visāl kī sūrat

lutf āġhāz se dikhātā thā

suḳhan us kā ma.aal kī sūrat

chashm-e-daurāñ se aaj chhuptī hai

anvarī o kamāl kī sūrat

lauh-e-imkāñ se aaj miTtī hai

'ilm o fazl o kamāl kī sūrat

dekh lo aaj phir na dekhoge

'ġhālib'-e-be-misāl kī sūrat

ab na duniyā meñ ā.eñge ye log

kahīñ DhūñDe na pā.eñge ye log

shahr meñ jo hai sog-vār hai aaj

apnā begāna ashk-bār hai aaj

nāzish-e-ḳhalq kā mahal na rahā

rihlat-e-faḳhr-e-rozgār hai aaj

thā zamāne meñ ek rangīñ tab'

ruḳhsat-e-mausam-e-bahār hai aaj

bār-e-ahbāb jo uThātā thā

dosh-e-ahbāb par savār hai aaj

thī har ik baat neshtar jis kī

us kī chup se jigar figār hai aaj

dil meñ muddat se thī ḳhalish jis kī

vahī barchhī jigar ke paar hai aaj

dil-e-muztar ko kaun de taskīñ

mātam-e-yār-e-ġham-gusār hai aaj

talḳhī-e-ġham kahī nahīñ jaatī

jān-e-shīrīñ bhī nāgavār hai aaj

kis ko laate haiñ bahr-e-dafn ki qabr

hama-tan chashm-e-intizār hai aaj

ġham se bhartā nahīñ dil-e-nāshād

kis se ḳhālī huā jahānābād

naqd-e-mā'nī kā ganj-dāñ na rahā

ḳhvān-e-mazmūñ kā mezbāñ na rahā

saath us ke ga.ī bahār-e-suḳhan

ab kuchh andesha-e-ḳhizāñ na rahā

huā ik ek kārvāñ-sālār

koī sālār-e-kārvāñ na rahā

raunaq-e-husn thā bayāñ us kā

garm bāzār-e-gul-ruḳhāñ na rahā

'ishq kā naam us se raushan thā

qais-o-farhād kā nishāñ na rahā

ho chukīñ husn-o-'ishq kī bāteñ

gul-o-bulbul kā tarjumāñ na rahā

ahl-e-hind ab kareñge kis par naaz

rashk-e-shīrāz o isfahāñ na rahā

zinda kyūñkar rahegā nām-e-mulūk

bādshāhoñ kā mad.h-ḳhvāñ na rahā

koī vaisā nazar nahīñ aatā

vo zamīñ aur vo āsmāñ na rahā

uTh gayā thā jo māya-dār-e-suḳhan

kis ko Thahrā.eñ ab madār-e-suḳhan

kyā hai jis meñ vo mard-e-kār na thā

ik zamāna ki sāzgār na thā

shā'irī kā kiyā haq us ne adā

par koī us kā haq-guzār na thā

be-sila mad.h o she'r be-tahsīn

suḳhan us kā kisī pe baar na thā

nazr-e-sā.il thī jaan tak lekin

dar-ḳhur-e-himmat eqtidār na thā

mulk-o-daulat se bahra-var na huā

jaan dene pe iḳhtiyār na thā

ḳhāksāroñ se ḳhāksārī thī

sar-balandoñ se inkisār na thā

lab pe ahbāb se bhī thā na gila

dil meñ aa'dā se bhī ġhubār na thā

be-riyā.ī thī zohd ke badle

zuhd us kā agar shi'ār na thā

aise paidā kahāñ haiñ mast-o-ḳharāb

ham ne maanā ki hoshyār na thā

maz.har-e-shān-e-husn-e-fitrat thā

mā'nī-e-lafz-e-ādamiyyat thā

kuchh nahīñ farq bāġh-o-zindāñ meñ

aaj bulbul nahīñ gulistāñ meñ

shahr saarā banā hai bait-e-huzn

ek yūsuf nahīñ jo kan'āñ meñ

mulk yaksar huā hai be-ā.īn

ik falātūñ nahīñ jo yūnāñ meñ

ḳhatm thī ik zabāñ pe shīrīnī

DhūñDte kyā ho seb-o-rummāñ meñ

hasr thī ik bayāñ meñ rangīnī

kyā dharā hai 'aqīq o marjāñ meñ

lab-e-jādū-bayāñ huā ḳhāmosh

gosh-e-gul vā hai kyoñ gulistāñ meñ

gosh-e-mā'nī-shinau huā be-kār

murġh kyoñ nā'ra-zan hai bustāñ meñ

vo gayā bazm jis se raushan thī

sham' jaltī hai kyoñ shabistāñ meñ

na rahā jis se thā faroġh-e-nazar

surma bantā hai kyoñ safāhāñ meñ

māh-e-kāmil meñ aa ga.ī zulmat

āb-e-haivāñ pe chhā ga.ī zulmat

hind meñ naam pā.egā ab kaun

sikka apnā biThā.egā ab kaun

ham ne jaanī hai us se qadr-e-salf

un par īmān lā.egā ab kaun

us ne sab ko bhulā diyā dil se

us ko dil se bhulā.egā ab kaun

thī kisī kī na jis meñ gunjā.ish

vo jagah dil meñ pā.egā ab kaun

us se milne ko yaañ ham aate the

jā ke dillī se aa.egā ab kaun

mar gayā qadr-dān-e-fahm-e-suḳhan

she'r ham ko sunā.egā ab kaun

mar gayā tishna-e-mazāq-e-kalām

ham ko ghar se bulā.egā ab kaun

thā bisāt-e-suḳhan meñ shātir ek

ham ko chāleñ batā.egā ab kaun

she'r meñ nā-tamām hai 'hālī'

ġhazal us kī banā.egā ab kaun

kam lanā fiihi mim bukā-o-'avīl

va 'itābun ma'azzamāni-tavīl

marsiya-e-mirza-ghaalib

kya kahun haal-e-dard-e-pinhani

waqt kotah o qissa tulani

'aish-e-duniya se ho gaya dil sard

dekh kar rang-e-'alam-e-fani

kuchh nahin juz tilism-e-KHwab-o-KHayal

gosha-e-faqr bazm-e-sultani

hai sarasar fareb-e-wahm-o-guman

taj-e-faghfur o taKHt-e-KHaqani

be-haqiqat hai shakl-e-mauj-e-sarab

jam-e-jamshed rah-e-raihani

lafz-e-muhmal hai nutq-e-a'rabi

harf-e-baatil hai 'aql-e-yunani

ek dhoka hai lahn-e-daudi

ek tamasha hai husn-e-kan'ani

na karun tishnagi mein tar lab-e-KHushk

chashma-e-KHizr ka ho gar pani

lun na ek musht-e-KHak ke badle

gar mile KHatam-e-sulemani

bahr-e-hasti ba-juz sarab nahin

chashma-e-zindagi mein aab nahin

jis se duniya ne aashnai ki

us se aaKHir ko kaj-adai ki

tujh pe phule koi 'abas ai 'umr

tu ne ki jis se bewafai ki

hai zamana wafa se begana

han qasam mujh ko aashnai ki

ye wo be-mehr hai ki hai is ki

sulh mein chashni laDai ki

hai yahan hazz-e-wasl se mahrum

jis ko taqat na ho judai ki

hai yahan hifz-e-waz' se mayus

jis ko 'adat na ho gadai ki

KHanda-e-gul se be-baqa-tar hai

shan ho jis mein dil-rubai ki

jins-e-kasid se narawa-tar hai

KHubiyan jis mein hon KHudai ki

baat bigDi rahi-sahi afsos

aaj KHaqani o sanai ki

rashk-e-'urfi o faKHr-e-talib murd

asadullah KHan ghaalib murd

bulbul-e-hind mar gaya haihat

jis ki thi baat baat mein ek baat

nukta-dan nukta-sanj nukta-shanas

pak-dil pak-zat pak-sifat

shaiKH aur bazla-sanj shoKH-mizaj

rind aur marja'-e-kiram o siqat

lakh mazmun aur us ka ek ThiThol

sau takalluf aur us ki sidhi baat

dil mein chubhta tha wo agar ba-masal

din ko kahta din aur raat ko raat

ho gaya naqsh dil pe jo likkha

qalam us ka tha aur us ki dawat

thin to dilli mein us ki baaten thin

le chalen ab watan ko kya saughat

us ke marne se mar gai dilli

KHwaja nausha tha aur shahr baraat

yan agar bazm thi to us ki bazm

yan agar zat thi to us ki zat

ek raushan dimagh tha na raha

shahr mein ek charagh tha na raha

dil ko baaten jab us ki yaad aaen

kis ki baaton se dil ko bahlaen

kis ko ja kar sunaen she'r-o-ghazal

kis se dad-e-suKHanwari paen

marsiya us ka likhte hain ahbab

kis se islah len kidhar jaen

past-mazmun hai nauha-e-ustad

kis tarah aasman pe pahunchaen

log kuchh puchhne ko aae hain

ahl-e-mayyat janaza Thahraen

laenge phir kahan se 'ghaalib' ko

su-e-madfan abhi na le jaen

is ko aglon pe kyon na den tarjih

ahl-e-insaf ghaur farmaen

qudsi o saib o asir o kalim

log jo chahen un ko Thahraen

hum ne sab ka kalam dekha hai

hai adab shart munh na khulwaen

ghaalib-e-nukta-dan se kya nisbat

KHak ko aasman se kya nisbat

nasr husn o jamal ki surat

nazm ghunj o dalal ki surat

tahniyat ek nashat ki taswir

ta'ziyat ek malal ki surat

qal us ka wo aaina jis mein

nazar aati thi haal ki surat

us ki taujih se pakaDti thi

shakl-e-imkan muhaal ki surat

us ki tawil se badalti thi

rang-e-hijran visal ki surat

lutf aaghaz se dikhata tha

suKHan us ka maal ki surat

chashm-e-dauran se aaj chhupti hai

anwari o kamal ki surat

lauh-e-imkan se aaj miTti hai

'ilm o fazl o kamal ki surat

dekh lo aaj phir na dekhoge

'ghaalib'-e-be-misal ki surat

ab na duniya mein aaenge ye log

kahin DhunDe na paenge ye log

shahr mein jo hai sog-war hai aaj

apna begana ashk-bar hai aaj

nazish-e-KHalq ka mahal na raha

rihlat-e-faKHr-e-rozgar hai aaj

tha zamane mein ek rangin tab'

ruKHsat-e-mausam-e-bahaar hai aaj

bar-e-ahbab jo uThata tha

dosh-e-ahbab par sawar hai aaj

thi har ek baat neshtar jis ki

us ki chup se jigar figar hai aaj

dil mein muddat se thi KHalish jis ki

wahi barchhi jigar ke par hai aaj

dil-e-muztar ko kaun de taskin

matam-e-yar-e-gham-gusar hai aaj

talKHi-e-gham kahi nahin jati

jaan-e-shirin bhi nagawar hai aaj

kis ko late hain bahr-e-dafn ki qabr

hama-tan chashm-e-intizar hai aaj

gham se bharta nahin dil-e-nashad

kis se KHali hua jahanabaad

naqd-e-ma'ni ka ganj-dan na raha

KHwan-e-mazmun ka mezban na raha

sath us ke gai bahaar-e-suKHan

ab kuchh andesha-e-KHizan na raha

hua ek ek karwan-salar

koi salar-e-karwan na raha

raunaq-e-husn tha bayan us ka

garm bazar-e-gul-ruKHan na raha

'ishq ka nam us se raushan tha

qais-o-farhad ka nishan na raha

ho chukin husn-o-'ishq ki baaten

gul-o-bulbul ka tarjuman na raha

ahl-e-hind ab karenge kis par naz

rashk-e-shiraaz o isfahan na raha

zinda kyunkar rahega nam-e-muluk

baadshahon ka madh-KHwan na raha

koi waisa nazar nahin aata

wo zamin aur wo aasman na raha

uTh gaya tha jo maya-dar-e-suKHan

kis ko Thahraen ab madar-e-suKHan

kya hai jis mein wo mard-e-kar na tha

ek zamana ki sazgar na tha

sha'iri ka kiya haq us ne ada

par koi us ka haq-guzar na tha

be-sila madh o she'r be-tahsin

suKHan us ka kisi pe bar na tha

nazr-e-sail thi jaan tak lekin

dar-KHur-e-himmat eqtidar na tha

mulk-o-daulat se bahra-war na hua

jaan dene pe iKHtiyar na tha

KHaksaron se KHaksari thi

sar-balandon se inkisar na tha

lab pe ahbab se bhi tha na gila

dil mein aa'da se bhi ghubar na tha

be-riyai thi zohd ke badle

zuhd us ka agar shi'ar na tha

aise paida kahan hain mast-o-KHarab

hum ne mana ki hoshyar na tha

mazhar-e-shan-e-husn-e-fitrat tha

ma'ni-e-lafz-e-adamiyyat tha

kuchh nahin farq bagh-o-zindan mein

aaj bulbul nahin gulistan mein

shahr sara bana hai bait-e-huzn

ek yusuf nahin jo kan'an mein

mulk yaksar hua hai be-ain

ek falatun nahin jo yunan mein

KHatm thi ek zaban pe shirini

DhunDte kya ho seb-o-rumman mein

hasr thi ek bayan mein rangini

kya dhara hai 'aqiq o marjaan mein

lab-e-jadu-bayan hua KHamosh

gosh-e-gul wa hai kyon gulistan mein

gosh-e-ma'ni-shinau hua be-kar

murgh kyon na'ra-zan hai bustan mein

wo gaya bazm jis se raushan thi

sham' jalti hai kyon shabistan mein

na raha jis se tha farogh-e-nazar

surma banta hai kyon safahan mein

mah-e-kaamil mein aa gai zulmat

aab-e-haiwan pe chha gai zulmat

hind mein nam paega ab kaun

sikka apna biThaega ab kaun

hum ne jaani hai us se qadr-e-salf

un par iman laega ab kaun

us ne sab ko bhula diya dil se

us ko dil se bhulaega ab kaun

thi kisi ki na jis mein gunjaish

wo jagah dil mein paega ab kaun

us se milne ko yan hum aate the

ja ke dilli se aaega ab kaun

mar gaya qadr-dan-e-fahm-e-suKHan

she'r hum ko sunaega ab kaun

mar gaya tishna-e-mazaq-e-kalam

hum ko ghar se bulaega ab kaun

tha bisat-e-suKHan mein shatir ek

hum ko chaalen bataega ab kaun

she'r mein na-tamam hai 'haali'

ghazal us ki banaega ab kaun

kam lana fihi mim buka-o-'awil

wa 'itabun ma'azzamani-tawil