na-karda KHataon ki jo tazir nai hai

nā-karda ḳhatāoñ kī jo tā'zīr na.ī hai

dil merā dukhāne kī ye tadbīr na.ī hai

is saal chaman meñ ba-farāvānī-e-yak-rang

aurāq-e-gul-o-lāla pe tasvīr na.ī hai

aisā na ho miT jaa.e ise ġhaur se paḌh le

miTTī pe mire ḳhuun kī tahrīr na.ī hai

āzād huuñ par apne ḳhayālāt meñ mahbūs

dīvāna nayā huuñ mirī zanjīr na.ī hai

ye fikr nahīñ kyā ho tag-o-tāz kā hāsil

maiñ ḳhush huuñ mirī kāvish-e-tā'mīr na.ī hai

behtar hai mujhe is kī zarā saḳht sazā de

ḳhāmoshī-e-paiham mirī taqsīr na.ī hai

is daur kā maiñ yūsuf-e-sānī huuñ mire paas

us ḳhvāb-e-shah-e-misr kī tā'bīr na.ī hai

ik bhed chhupā hai pas-e-dīvār-e-ḳhamoshī

is Thahre hue paanī kī tafsīr na.ī hai

be-mehrī-e-ahbāb kā shikva nahīñ 'shāhīñ'

is shahr kī miTTī hī meñ tāsīr na.ī hai

na-karda KHataon ki jo ta'zir nai hai

dil mera dukhane ki ye tadbir nai hai

is sal chaman mein ba-farawani-e-yak-rang

auraq-e-gul-o-lala pe taswir nai hai

aisa na ho miT jae ise ghaur se paDh le

miTTi pe mere KHun ki tahrir nai hai

aazad hun par apne KHayalat mein mahbus

diwana naya hun meri zanjir nai hai

ye fikr nahin kya ho tag-o-taz ka hasil

main KHush hun meri kawish-e-ta'mir nai hai

behtar hai mujhe is ki zara saKHt saza de

KHamoshi-e-paiham meri taqsir nai hai

is daur ka main yusuf-e-sani hun mere pas

us KHwab-e-shah-e-misr ki ta'bir nai hai

ek bhed chhupa hai pas-e-diwar-e-KHamoshi

is Thahre hue pani ki tafsir nai hai

be-mehri-e-ahbab ka shikwa nahin 'shahin'

is shahr ki miTTi hi mein tasir nai hai