bikhraw apne shahr ka dekha nahin gaya

bikhrāv apne shahr kā dekhā nahīñ gayā

bikhrā bhī is tarah ki sameTā nahīñ gayā

eḌī pe nāchtī rahī āzādiyoñ kī dhuup

lekin hamāre sar se añdherā nahīñ gayā

siinā paTaḳh rahe the mire gulsitāñ ke peḌ

lekin chaman se koī parinda nahīñ gayā

āñkhoñ kī putliyāñ bhī dhamāke meñ uḌ ga.iiñ

manzar vo āḳhrī thā ki dekhā nahīñ gayā

miltā nahīñ hai mulk meñ DhūñDeñ agar kahīñ

aisā koī bashar jise luuTā nahīñ gayā

bīnā.iyoñ ko khā ga.iiñ dīmak kī Toliyāñ

āñkhoñ se aaj bhī tirā chehrā nahīñ gayā

titlī ne pankh sauñp diye bāġhbān ko

phūloñ kā haal us se bhī dekhā nahīñ gayā

maaoñ ne apne laal kirā.e pe de diye

us se bhī is vatan kā kirāya nahīñ gayā

bikhraw apne shahr ka dekha nahin gaya

bikhra bhi is tarah ki sameTa nahin gaya

eDi pe nachti rahi aazadiyon ki dhup

lekin hamare sar se andhera nahin gaya

sina paTaKH rahe the mere gulsitan ke peD

lekin chaman se koi parinda nahin gaya

aankhon ki putliyan bhi dhamake mein uD gain

manzar wo aaKHri tha ki dekha nahin gaya

milta nahin hai mulk mein DhunDen agar kahin

aisa koi bashar jise luTa nahin gaya

binaiyon ko kha gain dimak ki Toliyan

aankhon se aaj bhi tera chehra nahin gaya

titli ne pankh saunp diye baghban ko

phulon ka haal us se bhi dekha nahin gaya

maon ne apne lal kirae pe de diye

us se bhi is watan ka kiraya nahin gaya