ab lagne lagi mujhko bhi be-kar ye duniya

ab lagne lagī mujh ko bhī be-kār ye duniyā

har moḌ pe jaise ki ho dīvār ye duniyā

Darte haiñ isī baat se ham ahl-e-vafā log

ham ko na samajh le kahīñ ġhaddār ye duniyā

sīñchī hai zamīñ logoñ ne bachchoñ ke lahū se

is baat se kaise kare inkār ye duniyā

insāf na milne pe bhī ye rahtī hai ḳhāmosh

hai kaafī dinoñ se baḌī bīmār ye duniyā

maiñ dekhtā huuñ jab kisī aḳhbār kī jānib

lagtā hai ki lāshoñ kā hai bāzār ye duniyā

barsoñ se vahāñ uThtī haiñ chīḳhoñ kī sadā.eñ

kar aa.ī thī jo ghar kabhī mismār ye duniyā

phūloñ kī taraf baḌhne kī himmat nahīñ karte

de detī hai jin hāthoñ meñ hathiyār ye duniyā

zālim kī taraf-dārī meñ masrūf hai har dam

ai kaash ho mazlūm kī ġham-ḳhvār ye duniyā

kyuuñ us kī hī rāhoñ meñ bichhā detī hai kāñTe

jis shaḳhs se kartī hai bahut pyaar ye duniyā

ye baat 'malāz' aap ko rakhnā hai sadā yaad

khā jaatī hai achchhe-bhale fankār ye duniyā

ab lagne lagi mujh ko bhi be-kar ye duniya

har moD pe jaise ki ho diwar ye duniya

Darte hain isi baat se hum ahl-e-wafa log

hum ko na samajh le kahin ghaddar ye duniya

sinchi hai zamin logon ne bachchon ke lahu se

is baat se kaise kare inkar ye duniya

insaf na milne pe bhi ye rahti hai KHamosh

hai kafi dinon se baDi bimar ye duniya

main dekhta hun jab kisi aKHbar ki jaanib

lagta hai ki lashon ka hai bazar ye duniya

barson se wahan uThti hain chiKHon ki sadaen

kar aai thi jo ghar kabhi mismar ye duniya

phulon ki taraf baDhne ki himmat nahin karte

de deti hai jin hathon mein hathiyar ye duniya

zalim ki taraf-dari mein masruf hai har dam

ai kash ho mazlum ki gham-KHwar ye duniya

kyun us ki hi rahon mein bichha deti hai kanTe

jis shaKHs se karti hai bahut pyar ye duniya

ye baat 'malaz' aap ko rakhna hai sada yaad

kha jati hai achchhe-bhale fankar ye duniya