duniya-e-dil mein pyar ki tanwir dekh lun

duniyā-e-dil meñ pyaar kī tanvīr dekh luuñ

band aañkh se maiñ aap kī tasvīr dekh luuñ

zulf-e-darāz bikhrī huī hai sañvāriye

kaise ghaTā se bantī hai zanjīr dekh luuñ

ab tak to ek lamha sukūñ kā nahīñ milā

ab aage kyā dikhā.egī taqdīr dekh luuñ

aañsū fuġhāñ alam hoñ ki bechārgī kā dard

kyā kyā mujhe 'atā huī jāgīr dekh luuñ

dariyā-e-faiz se tire māyūs to nahīñ

taqdīr meñ jo likkhī hai tāḳhīr dekh luuñ

āñkheñ haiñ jhiil hoñT kalī zulf hai ghaTā

jī chāhtā hai vādī-e-kashmīr dekh luuñ

dīvāna keh rahā thā shab-e-hijr bār-bār

kitnī mirī du'ā meñ hai tāsīr dekh luuñ

duniya-e-dil mein pyar ki tanwir dekh lun

band aankh se main aap ki taswir dekh lun

zulf-e-daraaz bikhri hui hai sanwariye

kaise ghaTa se banti hai zanjir dekh lun

ab tak to ek lamha sukun ka nahin mila

ab aage kya dikhaegi taqdir dekh lun

aansu fughan alam hon ki bechaargi ka dard

kya kya mujhe 'ata hui jagir dekh lun

dariya-e-faiz se tere mayus to nahin

taqdir mein jo likkhi hai taKHir dekh lun

aankhen hain jhil honT kali zulf hai ghaTa

ji chahta hai wadi-e-kashmir dekh lun

diwana keh raha tha shab-e-hijr bar-bar

kitni meri du'a mein hai tasir dekh lun