dil-KHun hua hai shoKHi-e-rang-e-hina ke sath

dil-ḳhūñ huā hai shoḳhī-e-rang-e-hinā ke saath

hai mā’nī-e-buland bhī tarz-e-adā ke saath

chaTkā jo dil to misl-e-gul-e-tar bikhar gayā

ḳhushbū sabā ke saath thī naġhma sadā ke saath

ye haal hai chaman meñ ki ab misl-e-barg-e-ḳhushk

āvāra ek 'umr se haiñ ham havā ke saath

zulfeñ udhar khulīñ idhar aañsū umañD paḌe

haiñ sab ke apne apne ravābit ghaTā ke saath

tum rang the to ḳhū-e-vafā thī guloñ meñ the

ḳhushbū bane to uḌ ga.e mauj-e-sabā ke saath

aahaT pe kaan raah meñ āñkheñ bichhī huī

ham duur tak chale tirī āvāz-e-pā ke saath

sankī havā to shorish-e-zindāñ bhī baḌh ga.ī

dil vajd meñ hai naġhma-e-zanjīr-e-pā ke saath

hai intihā-e-shauq bhī be-rāhiyoñ kā baab

ham thoḌī duur chalte haiñ har rahnumā ke saath

'bāqar' tumhārā shahr meñ zāmin banegā kaun

kuchh naqd bhī to chāhiye jins-e-vafā ke saath

dil-KHun hua hai shoKHi-e-rang-e-hina ke sath

hai ma’ni-e-buland bhi tarz-e-ada ke sath

chaTka jo dil to misl-e-gul-e-tar bikhar gaya

KHushbu saba ke sath thi naghma sada ke sath

ye haal hai chaman mein ki ab misl-e-barg-e-KHushk

aawara ek 'umr se hain hum hawa ke sath

zulfen udhar khulin idhar aansu umanD paDe

hain sab ke apne apne rawabit ghaTa ke sath

tum rang the to KHu-e-wafa thi gulon mein the

KHushbu bane to uD gae mauj-e-saba ke sath

aahaT pe kan rah mein aankhen bichhi hui

hum dur tak chale teri aawaz-e-pa ke sath

sanki hawa to shorish-e-zindan bhi baDh gai

dil wajd mein hai naghma-e-zanjir-e-pa ke sath

hai intiha-e-shauq bhi be-rahiyon ka bab

hum thoDi dur chalte hain har rahnuma ke sath

'baqar' tumhaara shahr mein zamin banega kaun

kuchh naqd bhi to chahiye jins-e-wafa ke sath