chamak rahi hai andhere mein bhi kiran ki tarah

chamak rahī hai añdhere meñ bhī kiran kī tarah

ye zindagī hai mirī sham'-e-anjuman kī tarah

hamārī tab'-e-pareshāñ ko pūchhtā kyā hai

ulajh ga.ī hai tirī zulf-e-pur-shikan kī tarah

sarishk-e-ġham ke sharāroñ se pūchh le ai dost

pighal rahā hai jigar sham'-e-anjuman kī tarah

ḳhayāl tak na kiyā apne rahnumāoñ ne

vatan meñ haal hamārā hai be-vatan kī tarah

ġhurūr-e-ḳhusrav-e-daurāñ ko toḌ sakte haiñ

hamārā 'azm bhī hai azm-e-kohkan kī tarah

abhī to mashq-e-suḳhan kī hai ibtidā ai 'nūr'

kahūñgā she'r kisī roz ahl-e-fan kī tarah

chamak rahi hai andhere mein bhi kiran ki tarah

ye zindagi hai meri sham'-e-anjuman ki tarah

hamari tab'-e-pareshan ko puchhta kya hai

ulajh gai hai teri zulf-e-pur-shikan ki tarah

sarishk-e-gham ke shararon se puchh le ai dost

pighal raha hai jigar sham'-e-anjuman ki tarah

KHayal tak na kiya apne rahnumaon ne

watan mein haal hamara hai be-watan ki tarah

ghurur-e-KHusraw-e-dauran ko toD sakte hain

hamara 'azm bhi hai azm-e-kohkan ki tarah

abhi to mashq-e-suKHan ki hai ibtida ai 'nur'

kahunga she'r kisi roz ahl-e-fan ki tarah