silsila shiddat-e-girya ka zara TuT gaya

silsila shiddat-e-girya kā zarā TuuT gayā

ḳhvāb jaarī thā magar mujh ko lagā TuuT gayā

toḌ ke pahle se rakkhā thā kisī ne shāyad

maiñ ne us putle ko jaise hī chhuā TuuT gayā

tar-ba-tar jism pasīne se huā ġham meñ tire

sar pe jaise mire paanī kā ghaḌā TuuT gayā

'ishq ke pankh lagā kar maiñ uḌā uḌtā phirā

aur jab nīche girā aisā girā TuuT gayā

tū ne jo dil ko mire zaḳhm diyā aaj bhī hai

maiñ ne jo tere liye ḳhvāb bunā TuuT gayā

us ne dhīre se mire kaan meñ kuchh aisā kahā

zor se dil ko mire dhakkā lagā TuuT gayā

haath par haath dhare bas maiñ yahī gaatā phirā

dil mirā TuuT gayā TuuT gayā TuuT gayā

silsila shiddat-e-girya ka zara TuT gaya

KHwab jari tha magar mujh ko laga TuT gaya

toD ke pahle se rakkha tha kisi ne shayad

main ne us putle ko jaise hi chhua TuT gaya

tar-ba-tar jism pasine se hua gham mein tere

sar pe jaise mere pani ka ghaDa TuT gaya

'ishq ke pankh laga kar main uDa uDta phira

aur jab niche gira aisa gira TuT gaya

tu ne jo dil ko mere zaKHm diya aaj bhi hai

main ne jo tere liye KHwab buna TuT gaya

us ne dhire se mere kan mein kuchh aisa kaha

zor se dil ko mere dhakka laga TuT gaya

hath par hath dhare bas main yahi gata phira

dil mera TuT gaya TuT gaya TuT gaya