jo tu nahin hai to jine ki aarzu bhi nahin

jo tū nahīñ hai to jiine kī aarzū bhī nahīñ

sukūn dil ko mile aisī justujū bhī nahīñ

tamām 'umr kā vā'da thā saath jiine kā

huā kuchh aisā ki ham aa.e rū-barū bhī nahīñ

luTā diyā hai har ik chiiz 'ishq meñ maiñ ne

ki mere paas to ab 'merī aabrū bhī nahīñ

hamārā dil hai na jaane kahāñ bahut DhūñDā

tumhāre paas nahīñ aur kū-ba-kū bhī nahīñ

nahīñ nahīñ mujhe tum aur zaḳhm mat denā

purānā zaḳhm-e-jigar to abhī rafū bhī nahīñ

vo daur-daur-e-mohabbat kī mushkileñ 'dānish'

samajh sake na mujhe log aur tū bhī nahīñ

jo tu nahin hai to jine ki aarzu bhi nahin

sukun dil ko mile aisi justuju bhi nahin

tamam 'umr ka wa'da tha sath jine ka

hua kuchh aisa ki hum aae ru-baru bhi nahin

luTa diya hai har ek chiz 'ishq mein main ne

ki mere pas to ab 'meri aabru bhi nahin

hamara dil hai na jaane kahan bahut DhunDa

tumhaare pas nahin aur ku-ba-ku bhi nahin

nahin nahin mujhe tum aur zaKHm mat dena

purana zaKHm-e-jigar to abhi rafu bhi nahin

wo daur-daur-e-mohabbat ki mushkilen 'danish'

samajh sake na mujhe log aur tu bhi nahin