gham tez hai to zist guzarna muhaal hai

ġham tez hai to ziist guzarnā muhāl hai

is zalzale meñ ghar kā Thaharnā muhāl hai

ik aag hai ki sho'la-fishāñ hai bahar-qadam

ab is zamīñ pe paaoñ bhī dharnā muhāl hai

sachchī ho vārdāt to dil bhūltā nahīñ

gahrā lage jo zaḳhm to bharnā muhāl hai

vo baat mere zehn meñ gūñjī hai raat bhar

vo baat jis kā zikr bhī karnā muhāl hai

raste meñ pattharoñ kī sileñ haiñ tanī huī

insāñ kā un ke paar guzarnā muhāl hai

us moḌ par huuñ maiñ ki jahāñ dosto mujhe

jiinā vabāl-e-jāñ hai to marnā muhāl hai

patthar kamar se bāñdh ke Duubā hai vo jarī

kyā sochte ho laash ubharnā muhāl hai

ab kis zabāñ se apnī hī tardīd kījiye

tahrīr de chuke to mukarnā muhāl hai

jazbe kī jitnī aag hai dil meñ dabī huī

kāġhaz pe she'r ban ke bikharnā muhāl hai

'zulfī' dukhoñ kā apne maiñ kyā tajziya karūñ

in gahre pāniyoñ meñ utarnā muhāl hai

gham tez hai to zist guzarna muhaal hai

is zalzale mein ghar ka Thaharna muhaal hai

ek aag hai ki sho'la-fishan hai bahar-qadam

ab is zamin pe paon bhi dharna muhaal hai

sachchi ho wardat to dil bhulta nahin

gahra lage jo zaKHm to bharna muhaal hai

wo baat mere zehn mein gunji hai raat bhar

wo baat jis ka zikr bhi karna muhaal hai

raste mein pattharon ki silen hain tani hui

insan ka un ke par guzarna muhaal hai

us moD par hun main ki jahan dosto mujhe

jina wabaal-e-jaan hai to marna muhaal hai

patthar kamar se bandh ke Duba hai wo jari

kya sochte ho lash ubharna muhaal hai

ab kis zaban se apni hi tardid kijiye

tahrir de chuke to mukarna muhaal hai

jazbe ki jitni aag hai dil mein dabi hui

kaghaz pe she'r ban ke bikharna muhaal hai

'zulfi' dukhon ka apne main kya tajziya karun

in gahre paniyon mein utarna muhaal hai