bijli ko mehman kiye arsa guzar gaya

bijlī ko mehmāñ kiye 'arsa guzar gayā

tā’mīr-e-āshiyāñ kiye 'arsa guzar gayā

ro ai mirī hayāt-e-hazīñ phuuT phuuT kar

dāman ko zau-fishāñ kiye 'arsa guzar gayā

nashtar chubhoiye ki mire zaḳhm hoñ hare

is dil ko gulsitāñ kiye 'arsa guzar gayā

kuchh to karo ḳhayāl ki ham muskurā sakeñ

ġham ko sharīk-e-jāñ kiye 'arsa guzar gayā

de ai junūn-e-shauq mujhe phir koī fareb

sahrā ko gulsitāñ kiye 'arsa guzar gayā

aao ki mil ke saath chaleñ rah-ravān-e-shauq

tanzīm-e-kārvāñ kiye 'arsa guzar gayā

bijli ko mehman kiye 'arsa guzar gaya

ta’mir-e-ashiyan kiye 'arsa guzar gaya

ro ai meri hayat-e-hazin phuT phuT kar

daman ko zau-fishan kiye 'arsa guzar gaya

nashtar chubhoiye ki mere zaKHm hon hare

is dil ko gulsitan kiye 'arsa guzar gaya

kuchh to karo KHayal ki hum muskura saken

gham ko sharik-e-jaan kiye 'arsa guzar gaya

de ai junun-e-shauq mujhe phir koi fareb

sahra ko gulsitan kiye 'arsa guzar gaya

aao ki mil ke sath chalen rah-rawan-e-shauq

tanzim-e-karwan kiye 'arsa guzar gaya