baiTha raha umid ka saghar liye hue

baiThā rahā umiid kā sāġhar liye hue

saaqī guzar gayā mai-e-kausar liye hue

apnā hī dil thā zaḳhm-e-talab varna vo nigāh

paikāñ liye hue thī na ḳhanjar liye hue

dāmān-e-dil se mauj-e-bahārāñ lipaT ga.ī

guzrā jo koī zulf-e-mu'attar liye hue

mai-ḳhāna nā-pasand hai piite haiñ ghar meñ shaiḳh

bas ek roz aa.e the sāġhar liye hue

merā hī kyā savāl hazāroñ bhaTak gaye

dast-e-talab meñ dāman-e-rahbar liye hue

kis ke ḳhirām par ye qayāmat bapā huī

uTThā ye kaun fitna-e-mahshar liye hue

baiTha raha umid ka saghar liye hue

saqi guzar gaya mai-e-kausar liye hue

apna hi dil tha zaKHm-e-talab warna wo nigah

paikan liye hue thi na KHanjar liye hue

daman-e-dil se mauj-e-bahaaran lipaT gai

guzra jo koi zulf-e-mu'attar liye hue

mai-KHana na-pasand hai pite hain ghar mein shaiKH

bas ek roz aae the saghar liye hue

mera hi kya sawal hazaron bhaTak gaye

dast-e-talab mein daman-e-rahbar liye hue

kis ke KHiram par ye qayamat bapa hui

uTTha ye kaun fitna-e-mahshar liye hue