baaton baaton mein koi aisa bhi dhoka de gaya

bātoñ bātoñ meñ koī aisā bhī dhoka de gayā

merī duniyā le gayā aur apnī duniyā de gayā

dard-e-dil ashk-e-ravāñ soz-e-tamannā de gayā

mehrbāñ kitnā thā koī mujh ko kyā kyā de gayā

kam na hone dī kabhī us ne mire ġham kī bahār

jab kabhī yaad aa gayā ik zaḳhm taaza de gayā

gardish-e-daurāñ se baḌh kar haiñ kahīñ us ke sitam

ġham jo duniyā de nahīñ saktī vo tanhā de gayā

zulm bhī kartā rahā vo rahm bhī kartā rahā

dil ko sahrā kar gayā āñkhoñ ko dariyā de gayā

chāñdnī rātoñ meñ jis kā muntazir rahtā thā maiñ

'umr bhar kā ġham ḳhushī kā ek lamha de gayā

ab to kaliyoñ ke tabassum se bhī Dar jaatā huuñ maiñ

muskurā kar jo milā vo zaḳhm gahrā de gayā

shā'irī 'bāqī' mire zaḳhmoñ kā marham ban ga.ī

merā qātil mujh ko lafzoñ kā sahārā de gayā

baaton baaton mein koi aisa bhi dhoka de gaya

meri duniya le gaya aur apni duniya de gaya

dard-e-dil ashk-e-rawan soz-e-tamanna de gaya

mehrban kitna tha koi mujh ko kya kya de gaya

kam na hone di kabhi us ne mere gham ki bahaar

jab kabhi yaad aa gaya ek zaKHm taza de gaya

gardish-e-dauran se baDh kar hain kahin us ke sitam

gham jo duniya de nahin sakti wo tanha de gaya

zulm bhi karta raha wo rahm bhi karta raha

dil ko sahra kar gaya aankhon ko dariya de gaya

chandni raaton mein jis ka muntazir rahta tha main

'umr bhar ka gham KHushi ka ek lamha de gaya

ab to kaliyon ke tabassum se bhi Dar jata hun main

muskura kar jo mila wo zaKHm gahra de gaya

sha'iri 'baqi' mere zaKHmon ka marham ban gai

mera qatil mujh ko lafzon ka sahaara de gaya