yaksu bhi lag raha hun bikharne ke bawajud

yaksū bhī lag rahā huuñ bikharne ke bāvajūd

puurī tarah marā nahīñ marne ke bāvajūd

ik dhuup sī tanī huī bādal ke ār-pār

ik pyaas hai rukī huī jharne ke bāvajūd

us ko bhī yaad karne kī fursat na thī mujhe

masrūf thā maiñ kuchh bhī na karne ke bāvajūd

pahlā bhī dūsrā hī kināra ho jis tarah

hālat vahī hai paar utarne ke bāvajūd

apnī taraf hī ruḳh thā vahāñ vārdāt kā

ilzām us ke naam pe dharne ke bāvajūd

hairāñ huuñ mujh meñ itnī ye himmat kahāñ se aa.ī

kar hī gayā huuñ kaam jo Darne ke bāvajūd

honā paḌā na hote hue bhī mujhe yahāñ

kuchh yaad rah gayā huuñ bisarne ke bāvajūd

jaisā bhī ye safar ho zarā ġhaur kījiye

kaisā ravāñ-davāñ huuñ Thaharne ke bāvajūd

niklā nahīñ hai koī natīja yahāñ 'zafar'

karne ke bāvajūd na bharne ke bāvajūd

yaksu bhi lag raha hun bikharne ke bawajud

puri tarah mara nahin marne ke bawajud

ek dhup si tani hui baadal ke aar-par

ek pyas hai ruki hui jharne ke bawajud

us ko bhi yaad karne ki fursat na thi mujhe

masruf tha main kuchh bhi na karne ke bawajud

pahla bhi dusra hi kinara ho jis tarah

haalat wahi hai par utarne ke bawajud

apni taraf hi ruKH tha wahan wardat ka

ilzam us ke nam pe dharne ke bawajud

hairan hun mujh mein itni ye himmat kahan se aai

kar hi gaya hun kaam jo Darne ke bawajud

hona paDa na hote hue bhi mujhe yahan

kuchh yaad rah gaya hun bisarne ke bawajud

jaisa bhi ye safar ho zara ghaur kijiye

kaisa rawan-dawan hun Thaharne ke bawajud

nikla nahin hai koi natija yahan 'zafar'

karne ke bawajud na bharne ke bawajud