jab tak gham-e-habib se wabastagi rahi

jab tak ġham-e-habīb se vābastagī rahī

ulfat kī shāh-rāh pe ik raushnī rahī

rusvā.iyoñ ke Dar se kabhī aah bhī na kī

ik aag thī jo dil meñ hamāre dabī rahī

pardes meñ ba-vaqt-e-naz' aayā jab bhī hosh

merī nigāh ḳhāk-e-vatan DhūñDtī rahī

ye un se pūchhiye ki ḳhushī kaisī chiiz hai

jin ko nasīb kashmakash-e-zindagī rahī

tā’mīr-e-tāj dekh ke kahtī hai har nigāh

sadiyāñ guzar ga.iiñ ye na.ī kī na.ī rahī

ik āshiyāñ ke jalse se itnā to ho gayā

gulshan meñ lamha bhar to 'zafar' raushnī rahī

jab tak gham-e-habib se wabastagi rahi

ulfat ki shah-rah pe ek raushni rahi

ruswaiyon ke Dar se kabhi aah bhi na ki

ek aag thi jo dil mein hamare dabi rahi

pardes mein ba-waqt-e-naz' aaya jab bhi hosh

meri nigah KHak-e-watan DhunDti rahi

ye un se puchhiye ki KHushi kaisi chiz hai

jin ko nasib kashmakash-e-zindagi rahi

ta’mir-e-taj dekh ke kahti hai har nigah

sadiyan guzar gain ye nai ki nai rahi

ek aashiyan ke jalse se itna to ho gaya

gulshan mein lamha bhar to 'zafar' raushni rahi