na koi husn-afrin na koi gham-gusar hai

na koī husn-āfrīñ na koī ġham-gusār hai

ye kis taraf maiñ aa gayā ye kaun sā dayār hai

fazā bhī ḳhush-gavār hai havā bhī mushk-bār hai

utar bhī aao āsmāñ se kis kā intizār hai

uTho ki ḳhvāb dekhne kā vaqt ab nahīñ rahā

uTho ki phuul khil chuke uTho ki ab bahār hai

ye kis ne nafratoñ ke biij bo diye zamīn meñ

kisī ko ab kisī pe bhī yaqīñ na e'tibār hai

vo 'umr bhar kī tishnagī ye sharbat-e-tahūr hai

kahāñ firāq-e-jāñ-gusal kahāñ visāl-e-yār hai

tū ḳhāk-e-be-nishāñ nahīñ ḳhudī se be-ḳhabar hai tū

jo ḳhāliq-e-jahān hai tū us kā shāhkār hai

ki jis taraf se aa rahī hai rang-o-bū-e-nastaran

vahī hai hind kī zamīñ vahī mirā dayār hai

na koi husn-afrin na koi gham-gusar hai

ye kis taraf main aa gaya ye kaun sa dayar hai

faza bhi KHush-gawar hai hawa bhi mushk-bar hai

utar bhi aao aasman se kis ka intizar hai

uTho ki KHwab dekhne ka waqt ab nahin raha

uTho ki phul khil chuke uTho ki ab bahaar hai

ye kis ne nafraton ke bij bo diye zamin mein

kisi ko ab kisi pe bhi yaqin na e'tibar hai

wo 'umr bhar ki tishnagi ye sharbat-e-tahur hai

kahan firaq-e-jaan-gusal kahan visal-e-yar hai

tu KHak-e-be-nishan nahin KHudi se be-KHabar hai tu

jo KHaliq-e-jahan hai tu us ka shahkar hai

ki jis taraf se aa rahi hai rang-o-bu-e-nastaran

wahi hai hind ki zamin wahi mera dayar hai