na baadban na sitara koi hamare sath

na bādbāñ na sitāra koī hamāre saath

na sub.h-e-nau kā ishāra koī hamāre saath

ziyāñ kaheñ ki ise hāsil-e-hayāt kaheñ

rahā na ḳhvāb hamārā koī hamāre saath

likhī thī hasrat-e-dīdār apnī qismat meñ

jo rah na paayā nazāra koī hamāre saath

musāfirān-e-rah-e-shauq ghar ko lauT chale

bus ek dasht kā maarā koī hamāre saath

huā na vasl use bhī tamām 'umr nasīb

lipaT ke royā kināra koī hamāre saath

tamām shahr use raushnī samajh baiThā

thā ek jaltā sharāra koī hamāre saath

'nadīm' aa ga.e ham us maqām par ki jahāñ

nahīñ hai apnā hamārā koī hamāre saath

na baadban na sitara koi hamare sath

na subh-e-nau ka ishaara koi hamare sath

ziyan kahen ki ise hasil-e-hayat kahen

raha na KHwab hamara koi hamare sath

likhi thi hasrat-e-didar apni qismat mein

jo rah na paya nazara koi hamare sath

musafiran-e-rah-e-shauq ghar ko lauT chale

bus ek dasht ka mara koi hamare sath

hua na wasl use bhi tamam 'umr nasib

lipaT ke roya kinara koi hamare sath

tamam shahr use raushni samajh baiTha

tha ek jalta sharara koi hamare sath

'nadim' aa gae hum us maqam par ki jahan

nahin hai apna hamara koi hamare sath