kaam aaya na kuchh apna tan-e-zar aaKHir-e-kar

kaam aayā na kuchh apnā tan-e-zār āḳhir-e-kār

samjhe iksīr the niklā vo ġhubār āḳhir-e-kār

bāġhbāñ thā tujhe do din kī havā par ye ġhurūr

na rahe baaġh meñ gul rah ga.e ḳhaar āḳhir-e-kār

'ishq zarra bhī agar ho to use kam mat jaan

ho ke sho'la hī bujhegā ye sharār āḳhir-e-kār

is qadar jur’a-kash-e-ḳhūn-e-ḳhalā.iq hai tū

jī dhaḌaktā hai ki khīñche na ḳhumār āḳhir-e-kār

juuñ vo parvāna jise sham' se ho sub.h ko vasl

garm ham se jo huī sohbat-e-yār āḳhir-e-kār

sozish-e-dāġh-e-dil apne kī vafā ai 'saudā'

kyā kahūñ maiñ ki huī sham'-e-mazār āḳhir-e-kār

kaam aaya na kuchh apna tan-e-zar aaKHir-e-kar

samjhe iksir the nikla wo ghubar aaKHir-e-kar

baghban tha tujhe do din ki hawa par ye ghurur

na rahe bagh mein gul rah gae KHar aaKHir-e-kar

'ishq zarra bhi agar ho to use kam mat jaan

ho ke sho'la hi bujhega ye sharar aaKHir-e-kar

is qadar jur’a-kash-e-KHun-e-KHalaiq hai tu

ji dhaDakta hai ki khinche na KHumar aaKHir-e-kar

jun wo parwana jise sham' se ho subh ko wasl

garm hum se jo hui sohbat-e-yar aaKHir-e-kar

sozish-e-dagh-e-dil apne ki wafa ai 'sauda'

kya kahun main ki hui sham'-e-mazar aaKHir-e-kar