sochta hun ki tazadat mein kya rakkha hai

sochtā huuñ ki tazādāt meñ kyā rakkhā hai

aate jaate hue din raat meñ kyā rakkhā hai

jo bhī aatā hai mire dil meñ vo keh detā huuñ

maiñ to pāgal huuñ mirī baat meñ kyā rakkhā hai

chand lamhoñ kī rafāqat nahīñ darkār mujhe

is adhūrī sī mulāqāt meñ kyā rakkhā hai

ham ne duniyā ko bahut ġhaur se dekhā hai magar

in badalte hue hālāt meñ kyā rakkhā hai

jo muqaddar meñ nahīñ us kī tamannā kaisī

aisī bekār shikāyāt meñ kyā rakkhā hai

ḳhaak chhānī hai zamāne kī baḌī muddat tak

ab kisī bhī na.ī sauġhāt meñ kyā rakkhā hai

apnī hī zaat se uljhā huā phirtā hai 'azīm'

sach to ye hai ki mirī zaat meñ kyā rakkhā hai

sochta hun ki tazadat mein kya rakkha hai

aate jate hue din raat mein kya rakkha hai

jo bhi aata hai mere dil mein wo keh deta hun

main to pagal hun meri baat mein kya rakkha hai

chand lamhon ki rafaqat nahin darkar mujhe

is adhuri si mulaqat mein kya rakkha hai

hum ne duniya ko bahut ghaur se dekha hai magar

in badalte hue haalat mein kya rakkha hai

jo muqaddar mein nahin us ki tamanna kaisi

aisi bekar shikayat mein kya rakkha hai

KHak chhani hai zamane ki baDi muddat tak

ab kisi bhi nai saughat mein kya rakkha hai

apni hi zat se uljha hua phirta hai 'azim'

sach to ye hai ki meri zat mein kya rakkha hai