ras kab aati hai KHushiyon ki farawani mujhe

raas kab aatī hai ḳhushiyoñ kī farāvānī mujhe

phir Dubo jā.egī bahr-e-ġham kī tuġhyānī mujhe

kab talak be-sūd dekhūñgā kitāb-e-māh-o-sāl

kab talak karnī hai yuuñ aurāq-gardānī mujhe

vāpsī kā rāsta bhūlā huuñ duniyā dekh kar

duur le aa.ī hai mujh se merī hairānī mujhe

dekhte hī dekhte maiñ bik gayā huuñ hāthoñ-hāth

kar ga.ī nāyāb kitnā merī arzānī mujhe

likh rahā huuñ ḳhud hī marg-e-zāt kā nauha 'nasīm'

vaqt ne sauñpī hai merī marsiya-ḳhvānī mujhe

ras kab aati hai KHushiyon ki farawani mujhe

phir Dubo jaegi bahr-e-gham ki tughyani mujhe

kab talak be-sud dekhunga kitab-e-mah-o-sal

kab talak karni hai yun auraq-gardani mujhe

wapsi ka rasta bhula hun duniya dekh kar

dur le aai hai mujh se meri hairani mujhe

dekhte hi dekhte main bik gaya hun hathon-hath

kar gai nayab kitna meri arzani mujhe

likh raha hun KHud hi marg-e-zat ka nauha 'nasim'

waqt ne saunpi hai meri marsiya-KHwani mujhe