luT kar mere yaqin ka hausla le jaega

luuT kar mere yaqīñ kā hauslā le jā.egā

ye na thī ummīd vo dāman bachā le jā.egā

baḌh gayā tūfān to saarī tanābeñ toḌ kar

sar se ehsāsāt kā ḳhema uḌā le jā.egā

be-sabab yādoñ ke sāhil TuuT kar girne na do

vaqt kā sail-e-ravāñ is ko bahā le jā.egā

yuuñ hī gar jalte rahe rāhoñ meñ sajdoñ ke diye

ye ujālā bhī koī zulmat-zada le jā.egā

ham-safar jitne bhī the sab ho ga.e paivand-e-rāh

ab kahāñ tak aur mujh ko rāsta le jā.egā

TūTte lamhoñ kī maiñ huuñ ek mub.ham bāz-gasht

mere paas aa.egā jo apnī sadā le jā.egā

ho ga.e ḳhvāboñ ke 'aiman' qasr saare munhadim

ab koī tūfān bhī aayā to kyā le jā.egā

luT kar mere yaqin ka hausla le jaega

ye na thi ummid wo daman bacha le jaega

baDh gaya tufan to sari tanaben toD kar

sar se ehsasat ka KHema uDa le jaega

be-sabab yaadon ke sahil TuT kar girne na do

waqt ka sail-e-rawan is ko baha le jaega

yun hi gar jalte rahe rahon mein sajdon ke diye

ye ujala bhi koi zulmat-zada le jaega

ham-safar jitne bhi the sab ho gae paiwand-e-rah

ab kahan tak aur mujh ko rasta le jaega

TuTte lamhon ki main hun ek mubham baz-gasht

mere pas aaega jo apni sada le jaega

ho gae KHwabon ke 'aiman' qasr sare munhadim

ab koi tufan bhi aaya to kya le jaega