khel sara hai yahan ruThi hui taqdir ka

khel saarā hai yahāñ rūThī huī taqdīr kā

maiñ nishāna ban gayā huuñ vaqt kī shamshīr kā

shahr ke logoñ ko kyā mā'lūm dukh fōtpath kā

ḳhaak meñ mil jā.egā ye dabdaba jāgīr kā

log patthar mārne aate haiñ pāgal jaan kar

shor jab kānoñ meñ gūñjā paaoñ kī zanjīr kā

chhīn lī hai gardish-e-daurāñ ne āñkhoñ kī chamak

rah gayā dhuñdlā sā ik ḳhāka mirī tasvīr kā

āstīnoñ meñ chhupā.e phir rahe haiñ sab yahāñ

tajraba ham ko huā hai vaqt kī shamshīr kā

chal diye 'rāshid' sū-e-maqtal udāsī oḌh kar

muntazir koī nahīñ ab ḳhvāb kī tā'bīr kā

khel sara hai yahan ruThi hui taqdir ka

main nishana ban gaya hun waqt ki shamshir ka

shahr ke logon ko kya ma'lum dukh footpath ka

KHak mein mil jaega ye dabdaba jagir ka

log patthar marne aate hain pagal jaan kar

shor jab kanon mein gunja paon ki zanjir ka

chhin li hai gardish-e-dauran ne aankhon ki chamak

rah gaya dhundla sa ek KHaka meri taswir ka

aastinon mein chhupae phir rahe hain sab yahan

tajraba hum ko hua hai waqt ki shamshir ka

chal diye 'rashid' su-e-maqtal udasi oDh kar

muntazir koi nahin ab KHwab ki ta'bir ka