gham ka tinka gira waqt ki nahr mein

ġham kā tinkā girā vaqt kī nahr meñ

koī machhlī na taḌpī kisī lahr meñ

koī khiltā sā chehra nahīñ dahr meñ

jis ko dekho bujhā hai kisī zahr meñ

aaj taakā hai sayyād ko barq ne

kitnī rahmat hai poshīda is qahr meñ

koī bādal nahīñ koī saaya nahīñ

jal rahā huuñ kaḌāke kī dopahr meñ

itne begāne log aa base haiñ yahāñ

ajnabī ho gayā huuñ bhare shahr meñ

jis ke sāhil pe gul-gasht kartā huuñ maiñ

phuul mere baheñge usī nahr meñ

mere ham-sā.e haiñ shaiḳh aur mohtasib

ghar ḳharāba hai baste hue shahr meñ

dīn-o-dil maañg lo jism-o-jāñ maañg lo

ham faqīr aa ga.e haiñ baḌī lahr meñ

dasht meñ rahzanoñ ne na chheḌā jinheñ

luT ga.e vo musāfir tire shahr meñ

gham ka tinka gira waqt ki nahr mein

koi machhli na taDpi kisi lahr mein

koi khilta sa chehra nahin dahr mein

jis ko dekho bujha hai kisi zahr mein

aaj taka hai sayyaad ko barq ne

kitni rahmat hai poshida is qahr mein

koi baadal nahin koi saya nahin

jal raha hun kaDake ki dopahr mein

itne begane log aa base hain yahan

ajnabi ho gaya hun bhare shahr mein

jis ke sahil pe gul-gasht karta hun main

phul mere bahenge usi nahr mein

mere ham-sae hain shaiKH aur mohtasib

ghar KHaraba hai baste hue shahr mein

din-o-dil mang lo jism-o-jaan mang lo

hum faqir aa gae hain baDi lahr mein

dasht mein rahzanon ne na chheDa jinhen

luT gae wo musafir tere shahr mein