anjam kahani ka ye hai ta-umr hamein nashad kiya

anjām kahānī kā ye hai tā-'umr hameñ nāshād kiyā

is bahs se ab kyā hāsil hai kis kis ne hameñ barbād kiyā

har aañkh kī bīnā.ī the kabhī ham kār-e-masīhā.ī the kabhī

us bastī par phir bojh bane jis bastī ko ābād kiyā

ham ḳhvāb kabhī the gulshan kā ummīd the har ik mausam kī

phir vaqt ne ham ko yuuñ bartā har rishte se āzād kiyā

ham raste banāyā karte the chalnā bhī sikhāyā karte the

ye 'ishq jo tum ab karte ho ham jaisoñ ne ījād kiyā

ham log purānā qissa haiñ ham log purānī rasmeñ haiñ

vo said haiñ jis ne apnī ḳhushī kuchh yādoñ ko sayyād kiyā

nāseh na banā 'abrak' koī kab koī chāra-sāz milā

tab zaḳhmoñ ko ārām aayā jab se hai ḳhudā ko yaad kiyā

anjam kahani ka ye hai ta-'umr hamein nashad kiya

is bahs se ab kya hasil hai kis kis ne hamein barbaad kiya

har aankh ki binai the kabhi hum kar-e-masihai the kabhi

us basti par phir bojh bane jis basti ko aabaad kiya

hum KHwab kabhi the gulshan ka ummid the har ek mausam ki

phir waqt ne hum ko yun barta har rishte se aazad kiya

hum raste banaya karte the chalna bhi sikhaya karte the

ye 'ishq jo tum ab karte ho hum jaison ne ijad kiya

hum log purana qissa hain hum log purani rasmen hain

wo said hain jis ne apni KHushi kuchh yaadon ko sayyaad kiya

naseh na bana 'abrak' koi kab koi chaara-saz mila

tab zaKHmon ko aaram aaya jab se hai KHuda ko yaad kiya