sitam hi karte rahe ho koi karam to nahin
sitam hī karte rahe ho koī karam to nahīñ
baġhaur dekho mirī aañkh phir bhī nam to nahīñ
hamārī jhūTī hañsī par na jaao ai logo
hameñ bhī pūchh lo koī ki koī ġham to nahīñ
ab aap itnī hiqārat se to na dekheñ hameñ
hamārā vaqt burā hai janāb ham to nahīñ
koī zarūrī nahīñ ab vo guftugū bhī kare
vo apne paas biThā.e hue hai kam to nahīñ
ye aur baat vo zillat-pazīr hoñ ke na hoñ
mirī nigāh meñ kuchh log mohtaram to nahīñ
kisī kā saath agar chhoḌnā paḌe 'kāshif'
to dhīre dhīre munāsib hai ek-dam to nahīñ
sitam hi karte rahe ho koi karam to nahin
baghaur dekho meri aankh phir bhi nam to nahin
hamari jhuTi hansi par na jao ai logo
hamein bhi puchh lo koi ki koi gham to nahin
ab aap itni hiqarat se to na dekhen hamein
hamara waqt bura hai janab hum to nahin
koi zaruri nahin ab wo guftugu bhi kare
wo apne pas biThae hue hai kam to nahin
ye aur baat wo zillat-pazir hon ke na hon
meri nigah mein kuchh log mohtaram to nahin
kisi ka sath agar chhoDna paDe 'kashif'
to dhire dhire munasib hai ek-dam to nahin
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.
