jabin-e-shauq har ek dar pe KHam nahin hoti

jabīn-e-shauq har ik dar pe ḳham nahīñ hotī

har ik zamīn zamīn-e-haram nahīñ hotī

kaḌī hai dhuup taġhāful kī phir bhī ai hamdam

kisī kī yaad kī parchhā.īñ kam nahīñ hotī

ziyā-faroz na hotīñ masarrateñ itnī

jo dil ke shīshe meñ tasvīr-e-ġham nahīñ hotī

kabhī kabhī jo baḌhā dard-e-dil to ġham kyuuñ ho

kabhī kabhī to masarrat bhī kam nahīñ hotī

gumān hotā hai phir koī hādsa hogā

ka.ī dinoñ se ḳhalish dil kī kam nahīñ hotī

likhūñ maiñ kaise unheñ hāl-e-ġham batā ai dil

hadīs-e-dard sipurd-e-qalam nahīñ hotī

ai 'nūr' miliye har ik se ba-ḳhanda-peshānī

ki jhuk ke milne se tauqīr kam nahīñ hotī

jabin-e-shauq har ek dar pe KHam nahin hoti

har ek zamin zamin-e-haram nahin hoti

kaDi hai dhup taghaful ki phir bhi ai hamdam

kisi ki yaad ki parchhain kam nahin hoti

ziya-faroz na hotin masarraten itni

jo dil ke shishe mein taswir-e-gham nahin hoti

kabhi kabhi jo baDha dard-e-dil to gham kyun ho

kabhi kabhi to masarrat bhi kam nahin hoti

guman hota hai phir koi hadsa hoga

kai dinon se KHalish dil ki kam nahin hoti

likhun main kaise unhen haal-e-gham bata ai dil

hadis-e-dard sipurd-e-qalam nahin hoti

ai 'nur' miliye har ek se ba-KHanda-peshani

ki jhuk ke milne se tauqir kam nahin hoti