ye meri hasti-e-jaan mein diya jalaya hai

ye merī hastī-e-jāñ meñ diyā jalāyā hai

jamāl-e-yār ne aisā mujhe sajāyā hai

mire vujūd meñ ḳhushbū-o-rang uḌne lage

numū-e-'ishq ne itnā mujhe sajāyā hai

falak ke nīche to insāf mil nahīñ saktā

so us ne is liye roz-e-jazā banāyā hai

hujūm-e-girya kā sāmān ho chukā thā maiñ

ye kis ne phir se mujhe aa.ina dikhāyā hai

qalandaroñ kī ye sohbat hai merā sarmāya

ḳhazīna ramz kā dil ko mire banāyā hai

maiñ ābnā-e-mohabbat meñ Dūbne lagā thā

tirā ḳhayāl kināre pe khīñch laayā hai

maiñ ek naam likhūñ vo bhī naam ho terā

ḳhayāl-o-harf-o-hikāyat meñ tū samāyā hai

bas ek huzn hai aur vo bhī raakh jaisā hai

'ajīb rang mirī ruuh par lagāyā hai

ye ḳhush-nasībī ki terā vujūd hai merā

talab hai aisī ki har pal tujhe kamāyā hai

ba-tarz-e-ahl-e-vafā 'ishq bāñTnā hai 'bashar'

agarche dil mirā apnoñ ne hī dukhāyā hai

ye meri hasti-e-jaan mein diya jalaya hai

jamal-e-yar ne aisa mujhe sajaya hai

mere wujud mein KHushbu-o-rang uDne lage

numu-e-'ishq ne itna mujhe sajaya hai

falak ke niche to insaf mil nahin sakta

so us ne is liye roz-e-jaza banaya hai

hujum-e-girya ka saman ho chuka tha main

ye kis ne phir se mujhe aaina dikhaya hai

qalandaron ki ye sohbat hai mera sarmaya

KHazina ramz ka dil ko mere banaya hai

main aabna-e-mohabbat mein Dubne laga tha

tera KHayal kinare pe khinch laya hai

main ek nam likhun wo bhi nam ho tera

KHayal-o-harf-o-hikayat mein tu samaya hai

bas ek huzn hai aur wo bhi rakh jaisa hai

'ajib rang meri ruh par lagaya hai

ye KHush-nasibi ki tera wujud hai mera

talab hai aisi ki har pal tujhe kamaya hai

ba-tarz-e-ahl-e-wafa 'ishq banTna hai 'bashar'

agarche dil mera apnon ne hi dukhaya hai