sahra-e-jaan mein surat-e-reg-e-parida hun

sahrā-e-jāñ meñ sūrat-e-reg-e-parīda huuñ

ik mustaqil sarāb huuñ so āb-dīda hoñ

ab is kā kyā 'ilāj ki terī vafā kā abr

barsā hai TuuT TuuT ke phir bhī tapīda huuñ

aa.uuñ to kaise aa.uuñ ḳhud apnī taraf ki maiñ

tere payām-e-nau kī tarah nā-rasīda huuñ

dil sang hai ki koh-e-nidā 'ishq hai tirā

ġham sabza-zār hai ki meñ ḳhāk-e-namīda huuñ

tere badan kā zahr bhī rag rag meñ hai ravāñ

maiñ apne ḳhauf-o-ḳhūñ kā bhī lazzat-chashīda huuñ

sadiyāñ thiiñ merī jaan shabeñ tere hijr kī

is e'tibār se maiñ bahut barguzīda huuñ

har bazm-o-anjuman meñ hai shohra mirā 'nazar'

naġhma huuñ jis kā us ke liye nā-shunīda huuñ

sahra-e-jaan mein surat-e-reg-e-parida hun

ek mustaqil sarab hun so aab-dida hon

ab is ka kya 'ilaj ki teri wafa ka abr

barsa hai TuT TuT ke phir bhi tapida hun

aaun to kaise aaun KHud apni taraf ki main

tere payam-e-nau ki tarah na-rasida hun

dil sang hai ki koh-e-nida 'ishq hai tera

gham sabza-zar hai ki mein KHak-e-namida hun

tere badan ka zahr bhi rag rag mein hai rawan

main apne KHauf-o-KHun ka bhi lazzat-chashida hun

sadiyan thin meri jaan shaben tere hijr ki

is e'tibar se main bahut barguzida hun

har bazm-o-anjuman mein hai shohra mera 'nazar'

naghma hun jis ka us ke liye na-shunida hun