phaila hua hai dasht bas ek qais hi nahin

phailā huā hai dasht bas ik qais hī nahīñ

ham ne to ye sunā thā ki lailā marī nahīñ

mujh nā-tavāñ kī baat hai kaun-o-makāñ kī baat

gar maiñ nahīñ to in kī zarūrat koī nahīñ

āñkheñ na hoñ to sab hai kisī be-basar kī baat

shams-o-qamar ke paas koī raushnī nahīñ

me'yār-e-zindagī ko ḳhudā mānñe ke baa'd

sab kuchh hai zindagī meñ magar zindagī nahīñ

jis ne kahā thā ye ki tire paas hai hī kyā

sab kuchh milegā us ko magar maiñ kabhī nahīñ

iblīs ko thā hukm ki sūrat ko sajda kar

āsāñ ye ḳhāl-o-ḳhad kī magar bandagī nahīñ

phaila hua hai dasht bas ek qais hi nahin

hum ne to ye suna tha ki laila mari nahin

mujh na-tawan ki baat hai kaun-o-makan ki baat

gar main nahin to in ki zarurat koi nahin

aankhen na hon to sab hai kisi be-basar ki baat

shams-o-qamar ke pas koi raushni nahin

me'yar-e-zindagi ko KHuda manne ke ba'd

sab kuchh hai zindagi mein magar zindagi nahin

jis ne kaha tha ye ki tere pas hai hi kya

sab kuchh milega us ko magar main kabhi nahin

iblis ko tha hukm ki surat ko sajda kar

aasan ye KHal-o-KHad ki magar bandagi nahin