na main aaya na main laya gaya hun
na maiñ aayā na maiñ laayā gayā huuñ
vahī kun huuñ jo farmāyā gayā huuñ
maiñ aisā giit huuñ ki har zabāñ se
har ik andāz meñ gaayā gayā huuñ
haqīqat khul chukī us baat kī ab
ki taḌpā huuñ yā taḌpāyā gayā huuñ
mirī apnī nahīñ hai koī sūrat
har ik sūrat meñ dikhlāyā gayā huuñ
bahut badle mire andāz lekin
jahāñ khoyā vahīñ paayā gayā huuñ
vajūd-e-ġhair ho kaise gavārā
tirī rāhoñ meñ be-sāya gayā huuñ
shab-e-ġham soz-e-hastī aur tirī yaad
khilaune de ke bahlāyā gayā huuñ
unhoñ ne jab kahā 'vāsif' kahāñ hai
ḳhajil-hastam ki be-māya gayā huuñ
na main aaya na main laya gaya hun
wahi kun hun jo farmaya gaya hun
main aisa git hun ki har zaban se
har ek andaz mein gaya gaya hun
haqiqat khul chuki us baat ki ab
ki taDpa hun ya taDpaya gaya hun
meri apni nahin hai koi surat
har ek surat mein dikhlaya gaya hun
bahut badle mere andaz lekin
jahan khoya wahin paya gaya hun
wajud-e-ghair ho kaise gawara
teri rahon mein be-saya gaya hun
shab-e-gham soz-e-hasti aur teri yaad
khilaune de ke bahlaya gaya hun
unhon ne jab kaha 'wasif' kahan hai
KHajil-hastam ki be-maya gaya hun
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.
