mere wujud ko taslim kyun nahin karte

mire vujūd ko taslīm kyuuñ nahīñ karte

ye log 'ain kī tafhīm kyuuñ nahīñ karte

maiñ apnī aadhī gavāhī ke saath 'aurat huuñ

so mujh ko ek pe taqsīm kyuuñ nahīñ karte

ye aa.ina hai jo andar se ḳhūbsūrat hai

nazar se chāñd ko do niim kyuuñ nahīñ karte

koī to 'ahd hamāre bhī naam ho jaa.e

na.e samāj meñ tarmīm kyuuñ nahīñ karte

savāl ye hai ki ham 'ain shiin qaaf ke baa'd

vafā meñ husn kī tajsīm kyuuñ nahīñ karte

ye do ghaḌī kā ta'alluq nahīñ mohabbat hai

ye dil-lagī hai ise miim kyuuñ nahīñ karte

diloñ pe raaj mohabbat kā den hai 'ambar'

ham apne bachchoñ ko tā'līm kyuuñ nahīñ karte

mere wujud ko taslim kyun nahin karte

ye log 'ain ki tafhim kyun nahin karte

main apni aadhi gawahi ke sath 'aurat hun

so mujh ko ek pe taqsim kyun nahin karte

ye aaina hai jo andar se KHubsurat hai

nazar se chand ko do nim kyun nahin karte

koi to 'ahd hamare bhi nam ho jae

nae samaj mein tarmim kyun nahin karte

sawal ye hai ki hum 'ain shin qaf ke ba'd

wafa mein husn ki tajsim kyun nahin karte

ye do ghaDi ka ta'alluq nahin mohabbat hai

ye dil-lagi hai ise mim kyun nahin karte

dilon pe raj mohabbat ka den hai 'ambar'

hum apne bachchon ko ta'lim kyun nahin karte