kuchh is liye shikasta hua hausla mera

kuchh is liye shikasta huā hausla mirā

dekhā nahīñ hai us ne bhī dast-e-du'ā mirā

har 'ahd meñ bahāroñ pe jāneñ luTā.ī haiñ

pazhmurda mausamoñ se ta'alluq hī kyā mirā

is ke sivā koī bhī mirā ham-suḳhan nahīñ

nārāz ho na jaa.e kahīñ aa.ina mirā

sab raushnī ke raaz samo.e haiñ shauq se

she'roñ meñ paḌh sako to paḌho mudda'ā mirā

kartā huuñ yaad 'ālam-e-lāhūt is liye

lenā hai imtihān ḳhudā ne kaḌā mirā

lahroñ se chheḌ-chhāḌ mirā zaatī fe'l thā

dariyā ke saath bantā nahīñ hai gila mirā

maiñ ruuh ke jahān kī kartā huuñ tair sair

afsāna-e-vujūd hai sab se judā mirā

kis des kā huuñ kaun-sī duniyā se aayā huuñ

khultā nahīñ kisī pe yahāñ zā.icha mirā

is meñ 'razā' kī chashm-e-tamannā kā hai ḳhumār

himmat hai aap meñ to bujhāo diyā mirā

kuchh is liye shikasta hua hausla mera

dekha nahin hai us ne bhi dast-e-du'a mera

har 'ahd mein bahaaron pe jaanen luTai hain

pazhmurda mausamon se ta'alluq hi kya mera

is ke siwa koi bhi mera ham-suKHan nahin

naraaz ho na jae kahin aaina mera

sab raushni ke raaz samoe hain shauq se

she'ron mein paDh sako to paDho mudda'a mera

karta hun yaad 'alam-e-lahut is liye

lena hai imtihan KHuda ne kaDa mera

lahron se chheD-chhaD mera zati fe'l tha

dariya ke sath banta nahin hai gila mera

main ruh ke jahan ki karta hun tair sair

afsana-e-wujud hai sab se juda mera

kis des ka hun kaun-si duniya se aaya hun

khulta nahin kisi pe yahan zaicha mera

is mein 'raza' ki chashm-e-tamanna ka hai KHumar

himmat hai aap mein to bujhao diya mera