hile na honT tere qurb ke bayan ke liye

hile na hoñT tire qurb ke bayāñ ke liye

ye zā.iqa hī nayā hai mirī zabāñ ke liye

chalegā ab to jazīra kisī kināre kī samt

ki abr bāñdh liyā ab to bādbāñ ke liye

nikal paḌe ho khule meñ to kyā daraḳht kī chhāñv

falak hī taan chalo sir pe sā.ebāñ ke liye

maiñ kaun kaun se dīvār-o-dar ko yaad karūñ

dhaḌak rahā hai mirā dil to har makāñ ke liye

har ek karb mire hī nisāb meñ to nahīñ

ye kyā ki maiñ hī chunā jā.ūñ imtihāñ ke liye

kahāñ likhūñ ki na pahuñche jahāñ pe vaqt kā haath

qadam kahāñ pe dharūñ dā.imī nishāñ ke liye

mahak miTegī ġhamoñ kī kab ai havā-e-chaman

khilā huā huuñ maiñ kis mausam-e-ḳhizāñ ke liye

na ab vo apnī tamanna na terī ḳhvāhish-e-ḳhās

maiñ jī rahā huuñ ye kis 'umr-e-rā.egāñ ke liye

ḳhalā meñ pheñk rahā huuñ jalā jalā ke charāġh

banā rahā huuñ sitāre kuchh āsmāñ ke liye

daraḳht pahnūñ badan par sañvār luuñ shāḳheñ

ki peḌ DhūñD rahā hai vo āshiyāñ ke liye

zarā na TuuT sakā bahr-e-be-ravāñ kā sukūt

havā chalī hī nahīñ apne bādbāñ ke liye

bas ik safed sī tasvīr ban ga.ī hai 'adīm'

mile na rang mujhe apnī dāstāñ ke liye

hile na honT tere qurb ke bayan ke liye

ye zaiqa hi naya hai meri zaban ke liye

chalega ab to jazira kisi kinare ki samt

ki abr bandh liya ab to baadban ke liye

nikal paDe ho khule mein to kya daraKHt ki chhanw

falak hi tan chalo sir pe saeban ke liye

main kaun kaun se diwar-o-dar ko yaad karun

dhaDak raha hai mera dil to har makan ke liye

har ek karb mere hi nisab mein to nahin

ye kya ki main hi chuna jaun imtihan ke liye

kahan likhun ki na pahunche jahan pe waqt ka hath

qadam kahan pe dharun daimi nishan ke liye

mahak miTegi ghamon ki kab ai hawa-e-chaman

khila hua hun main kis mausam-e-KHizan ke liye

na ab wo apni tamanna na teri KHwahish-e-KHas

main ji raha hun ye kis 'umr-e-raegan ke liye

KHala mein phenk raha hun jala jala ke charagh

bana raha hun sitare kuchh aasman ke liye

daraKHt pahnun badan par sanwar lun shaKHen

ki peD DhunD raha hai wo aashiyan ke liye

zara na TuT saka bahr-e-be-rawan ka sukut

hawa chali hi nahin apne baadban ke liye

bas ek safed si taswir ban gai hai 'adim'

mile na rang mujhe apni dastan ke liye