ghubar ban ke uTha dil mein raushni ka tilism

ġhubār ban ke uThā dil meñ raushnī kā tilism

ye kis maqām pe laayā tirī galī kā tilism

ab aa.e bhī to 'abas hai payām-e-be-ḳhabarī

hudūd de bhī chukā ham ko āgahī kā tilism

asīr-e-dar-badarī huuñ so mere saath na chal

tujhe bhī ḳhaak na kar de ye be-gharī kā tilism

jahāz-rān ne dil se girā diye langar

chamak rahā thā tah-e-āb jal-parī kā tilism

hadaf huā thā mirā qāfile kā pahlā fard

ki jab havās pe chhāyā thā āḳhrī kā tilism

purānī khaal utāregā 'aun' vaqt kā saañp

har ek pal meñ simaT aa.egā sadī kā tilism

ghubar ban ke uTha dil mein raushni ka tilism

ye kis maqam pe laya teri gali ka tilism

ab aae bhi to 'abas hai payam-e-be-KHabari

hudud de bhi chuka hum ko aagahi ka tilism

asir-e-dar-badari hun so mere sath na chal

tujhe bhi KHak na kar de ye be-ghari ka tilism

jahaz-ran ne dil se gira diye langar

chamak raha tha tah-e-ab jal-pari ka tilism

hadaf hua tha mera qafile ka pahla fard

ki jab hawas pe chhaya tha aaKHri ka tilism

purani khaal utarega 'aun' waqt ka sanp

har ek pal mein simaT aaega sadi ka tilism