apna wujud had se izafi laga mujhe

apnā vujūd had se izāfī lagā mujhe

terī nazar kā vaar bhī shoḳhī lagā mujhe

tere badan se rang churātī haiñ titliyāñ

tere baġhair phuul bhī baasī lagā mujhe

matlab kī Dor haiñ sabhī rishte fareb haiñ

sab se bichhaḌ ke ronā rihā.ī lagā mujhe

terī qabā kā nuur matā'-e-hayāt hai

tere badan kā 'aks ḳhudā.ī lagā mujhe

tere baġhair jiinā jahannam se kam nahīñ

tere baġhair hañsnā duhā.ī lagā mujhe

taktā hai us kā husn tavaqquf kiye baġhair

'kāshif' ye aa.ina baḌī hastī lagā mujhe

apna wujud had se izafi laga mujhe

teri nazar ka war bhi shoKHi laga mujhe

tere badan se rang churaati hain titliyan

tere baghair phul bhi basi laga mujhe

matlab ki Dor hain sabhi rishte fareb hain

sab se bichhaD ke rona rihai laga mujhe

teri qaba ka nur mata'-e-hayat hai

tere badan ka 'aks KHudai laga mujhe

tere baghair jina jahannam se kam nahin

tere baghair hansna duhai laga mujhe

takta hai us ka husn tawaqquf kiye baghair

'kashif' ye aaina baDi hasti laga mujhe