lagte hain nit jo KHuban sharmane bawle hain

lagte haiñ nit jo ḳhūbāñ sharmāne bāvle haiñ

ham log vahshī ḳhabtī dīvāne bāvle haiñ

ye sehr kyā kiyā hai bāloñ kī darhamī ne

jo us parī par apne begāne bāvle haiñ

jī jhoñktā hai koī ātish meñ nāhaq apnā

jalte haiñ sham.a par jo parvāne bāvle haiñ

ismat kā apnī us ko jab aaphī ġham na hove

lagte haiñ ham jo nāhaq ġham khāne bāvle haiñ

us mai kā ek qatra sūrāḳh-e-dil kare hai

bhar bhar jo ham piyeñ haiñ paimāne bāvle haiñ

gardish se putliyoñ kī sar-gashta hai zamāna

mastī se us nigah kī mai-ḳhāne bāvle haiñ

jaate haiñ us galī meñ laḌkoñ ko saath le kar

myaañ 'mus.hafī' bhī yaaro kyā syāne bāvle haiñ

lagte hain nit jo KHuban sharmane bawle hain

hum log wahshi KHabti diwane bawle hain

ye sehr kya kiya hai baalon ki darhami ne

jo us pari par apne begane bawle hain

ji jhonkta hai koi aatish mein nahaq apna

jalte hain shama par jo parwane bawle hain

ismat ka apni us ko jab aaphi gham na howe

lagte hain hum jo nahaq gham khane bawle hain

us mai ka ek qatra suraKH-e-dil kare hai

bhar bhar jo hum piyen hain paimane bawle hain

gardish se putliyon ki sar-gashta hai zamana

masti se us nigah ki mai-KHane bawle hain

jate hain us gali mein laDkon ko sath le kar

myan 'mushafi' bhi yaro kya syane bawle hain