jo aks bhi dekhoge wo surat hai hamari

jo 'aks bhī dekhoge vo sūrat hai hamārī

ā.īne badaltī huī vahshat hai hamārī

kas lete haiñ har kos pe sāmān kī girheñ

us yaad sivā kaun sī daulat hai hamārī

hai naqsh-e-kaf-e-pā meñ ka.ī chashmoñ kā afsūñ

be-abr zamīnoñ ko suhūlat hai hamārī

jo sabz rutoñ ne tire lahje se churā.e

barsoñ unhīñ gītoñ pe riyāzat hai hamārī

maḳhsūs na rakh bahr-e-ḳhudā vasl ke lamhe

tujh farz se pahle to 'aqīdat hai hamārī

sāñpoñ se ghirā rahtā hai ḳhvāboñ kā ḳhazīna

kis niiñd meñ khoī huī qismat hai hamārī

jo 'aks bhi dekhoge wo surat hai hamari

aaine badalti hui wahshat hai hamari

kas lete hain har kos pe saman ki girhen

us yaad siwa kaun si daulat hai hamari

hai naqsh-e-kaf-e-pa mein kai chashmon ka afsun

be-abr zaminon ko suhulat hai hamari

jo sabz ruton ne tere lahje se churae

barson unhin giton pe riyazat hai hamari

maKHsus na rakh bahr-e-KHuda wasl ke lamhe

tujh farz se pahle to 'aqidat hai hamari

sanpon se ghira rahta hai KHwabon ka KHazina

kis nind mein khoi hui qismat hai hamari