hum ko tumhaara hijr manane ka dukh hua

ham ko tumhārā hijr manāne kā dukh huā

dil ko bhī yaar tujh ko gañvāne kā dukh huā

peḌoñ se uḌ ke jaane parinde kahāñ gaye

dil ko shikār haath se jaane kā dukh huā

ik baar terī aañkh se ham ne milā.ī aañkh

phir us ke baa'd aañkh milāne kā dukh huā

shāyad ki be-asar thī mohabbat kī dāstāñ

be-kaif dostoñ ko sunāne kā dukh huā

is dil ke canvas pe judā.ī ke rang the

tasvīr āñsuoñ kī banāne kā dukh huā

raste kī gard aur thī vahshat kī gard aur

jo gard bhī uḌaa.ī uḌāne kā dukh huā

vahshat ke raaz aañkh se dil meñ utar gaye

ai dasht tujh se haath milāne kā dukh huā

duniyā tire usuul bhī kitne 'ajīb haiñ

uThte huoñ ko aaj girāne kā dukh huā

ḳhud ko samajh rahā thā vo jins-e-girāñ magar

'faisal' mujhe to daam girāne kā dukh huā

hum ko tumhaara hijr manane ka dukh hua

dil ko bhi yar tujh ko ganwane ka dukh hua

peDon se uD ke jaane parinde kahan gaye

dil ko shikar hath se jaane ka dukh hua

ek bar teri aankh se hum ne milai aankh

phir us ke ba'd aankh milane ka dukh hua

shayad ki be-asar thi mohabbat ki dastan

be-kaif doston ko sunane ka dukh hua

is dil ke canwas pe judai ke rang the

taswir aansuon ki banane ka dukh hua

raste ki gard aur thi wahshat ki gard aur

jo gard bhi uDai uDane ka dukh hua

wahshat ke raaz aankh se dil mein utar gaye

ai dasht tujh se hath milane ka dukh hua

duniya tere usul bhi kitne 'ajib hain

uThte huon ko aaj girane ka dukh hua

KHud ko samajh raha tha wo jins-e-giran magar

'faisal' mujhe to dam girane ka dukh hua