dil KHauf mein hai aankhon se wahshat nahin jati

dil ḳhauf meñ hai āñkhoñ se vahshat nahīñ jaatī

kyā kījiyegā merī aziyyat nahīñ jaatī

haañ vaqt lagā detā hai har zaḳhm pe marham

par dil se kabhī pahlī mohabbat nahīñ jaatī

afsos ki Dhal jā.egā husn un kā kisī din

jin laḌkiyoñ kī aaj nazākat nahīñ jaatī

rahte haiñ baḌe pyaar se jangal meñ parinde

aur shahr kī dīvāroñ se nafrat nahīñ jaatī

āsān nahīñ hotā hai 'ādāt badalnā

'ādāt badal saktī haiñ fitrat nahīñ jaatī

merī bhī pareshāniyāñ fursat meñ kabhī sun

ik to ye mirī jaañ tirī 'ujlat nahīñ jaatī

be-ant hasīnā.eñ haiñ maujūd valekin

'hassām' mire dil se vo 'aurat nahīñ jaatī

dil KHauf mein hai aankhon se wahshat nahin jati

kya kijiyega meri aziyyat nahin jati

han waqt laga deta hai har zaKHm pe marham

par dil se kabhi pahli mohabbat nahin jati

afsos ki Dhal jaega husn un ka kisi din

jin laDkiyon ki aaj nazakat nahin jati

rahte hain baDe pyar se jangal mein parinde

aur shahr ki diwaron se nafrat nahin jati

aasan nahin hota hai 'adat badalna

'adat badal sakti hain fitrat nahin jati

meri bhi pareshaniyan fursat mein kabhi sun

ek to ye meri jaan teri 'ujlat nahin jati

be-ant hasinaen hain maujud walekin

'hassam' mere dil se wo 'aurat nahin jati