تو مری نظر کا سرور ہے دل بے نوا کا قرار ہے

تو مری نظر کا سرور ہے دل بے نوا کا قرار ہے

تو خزاں رسیدہ حیات کی مری ایک فصل بہار ہے

ترے در پہ گرچہ نہ آ سکوں تجھے مدعا نہ سنا سکوں

ترا نام ہی مرے ساقیا مری اک متاع قرار ہے

نہیں وہ زبان و قلم کہیں مرا شوق وصل جو کہہ سکے

مرا درد دل جو سنا سکے کہاں ساز میں وہ پکار ہے

کہاں میرے دامن تنگ میں کوئی سیم و زر میں ہوں خاکسار

فقط ایک جان ہے ساقیا وہ ترے حضور نثار ہے

ترے عشق نے مجھے کر دیا غم روزگار سے بے نیاز

نہ خزاں کا خوف ہے سعدیؔ کو نہ ہی انتظار بہار ہے