محبت کا ہر اک لمحہ حسیں لمحے میں آ جائے
محبت کا ہر اک لمحہ حسیں لمحے میں آ جائے
جو میں در کھول دوں خوشبو تری کمرے میں آ جائے
تجھے دیکھیں گے سب میلے میں میلہ کون دیکھے گا
مرا دعویٰ ہے تو سج کر اگر میلے میں آ جائے
پرندہ تو ابھی آزاد پھرتا ہے فضاؤں میں
شکاری جال پھیلا دے تو وہ پنجرے میں آ جائے
بہادر وہ ہے نکلے جنگ میں سر پر کفن باندھے
جو بزدل ہے وہ واپس لوٹ کے خیمے میں آ جائے
دعا یہ ہے بچائے ہر مصیبت سے خدا تجھ کو
ترے حصے کا سارا غم مرے حصے میں آ جائے
یہ تبدیلی تمہارے قد کو اونچا اور کر دے گی
ذرا سی سادگی جو طنزیہ لہجے میں آ جائے
پگھل جائے نہ اس کا موم کے جیسا بدن مضطرؔ
بلا کی دھوپ ہے کہہ دو اسے سائے میں آ جائے
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.
