meri aah ko kuchh asar chahiye

mirī aah ko kuchh asar chāhiye

mujhe aap kī ik nazar chāhiye

jinheñ zindagī maiñ ne kī hai 'atā

sunā hai unheñ merā sar chāhiye

ho āsān rasta to phir kyā maza

mujhe ik rah-e-pur-ḳhatar chāhiye

faqat tere vā'de se hotā hai kyā

hameñ sar chhupāne ko ghar chāhiye

karo apnī himmat ko do chand tum

agar najm-o-shams-o-qamar chāhiye

zarūrat tujhe merī ho yā na ho

tirā saath mujh ko magar chāhiye

mubārak tumheñ ho ravish ġhair kī

mujhe 'shams' apnī Dagar chāhiye

meri aah ko kuchh asar chahiye

mujhe aap ki ek nazar chahiye

jinhen zindagi main ne ki hai 'ata

suna hai unhen mera sar chahiye

ho aasan rasta to phir kya maza

mujhe ek rah-e-pur-KHatar chahiye

faqat tere wa'de se hota hai kya

hamein sar chhupane ko ghar chahiye

karo apni himmat ko do chand tum

agar najm-o-shams-o-qamar chahiye

zarurat tujhe meri ho ya na ho

tera sath mujh ko magar chahiye

mubarak tumhein ho rawish ghair ki

mujhe 'shams' apni Dagar chahiye