mera tum sath na dogi to kidhar jaunga

merā tum saath na dogī to kidhar jā.ūñgā

sar paTak kar tirī dahlīz pe mar jā.ūñgā

rāh-e-ulfat meñ bichhāogī agar ḳhār-e-jafā

ḳhaar ko phuul samajh kar maiñ guzar jā.ūñgā

ruḳh se chilman ko zarā aur uThā ai jānāñ

ruḳh tirā dekh ke thoḌā maiñ sañvar jā.ūñgā

zāhiran Thiik huuñ andar se huuñ TūTā-phūTā

haath gar mujh ko lagāyā to bikhar jā.ūñgā

terī ulfat meñ bhulā dūñgā zamāna saarā

tum jo mil jaao to duniyā se mukar jā.ūñgā

merī ḳhāmosh mohabbat kī ye manzil hogī

ban ke ehsās tire dil meñ utar jā.ūñgā

is qadar duur nikal aayā huuñ apnoñ se 'azīm'

jaane kab lauT ke maiñ apne nagar jā.ūñgā

mera tum sath na dogi to kidhar jaunga

sar paTak kar teri dahliz pe mar jaunga

rah-e-ulfat mein bichhaogi agar KHar-e-jafa

KHar ko phul samajh kar main guzar jaunga

ruKH se chilman ko zara aur uTha ai jaanan

ruKH tera dekh ke thoDa main sanwar jaunga

zahiran Thik hun andar se hun TuTa-phuTa

hath gar mujh ko lagaya to bikhar jaunga

teri ulfat mein bhula dunga zamana sara

tum jo mil jao to duniya se mukar jaunga

meri KHamosh mohabbat ki ye manzil hogi

ban ke ehsas tere dil mein utar jaunga

is qadar dur nikal aaya hun apnon se 'azim'

jaane kab lauT ke main apne nagar jaunga