hamari samt zara ab wo dekhta kam hai

hamārī samt zarā ab vo dekhtā kam hai

ta'alluqāt to behtar haiñ vāsta kam hai

milā to kartā hai sab se vo muskurāte hue

magar ḳhulūs jise kahiye vo zarā kam hai

ḳhulūs-o-pyār ke charche haiñ har taraf lekin

is 'ahd-e-nau meñ magar dosto vafā kam hai

har ek shaḳhs samajhtā hai rahnumā ḳhud ko

yahī sabab hai yahāñ par jo qāfila kam hai

hamesha hichkiyāñ aatī haiñ un kī yādoñ kī

ye kis ne keh diyā yādoñ kā silsila kam hai

maiñ maslahat se ta'alluq zarā nahīñ rakhtā

yahī sabab hai ki logoñ se rābta kam hai

hasīn is liye ḳhud ko sabhī samajhte haiñ

ki apne shahr meñ ai 'nūr' aa.ina kam hai

hamari samt zara ab wo dekhta kam hai

ta'alluqat to behtar hain wasta kam hai

mila to karta hai sab se wo muskuraate hue

magar KHulus jise kahiye wo zara kam hai

KHulus-o-pyar ke charche hain har taraf lekin

is 'ahd-e-nau mein magar dosto wafa kam hai

har ek shaKHs samajhta hai rahnuma KHud ko

yahi sabab hai yahan par jo qafila kam hai

hamesha hichkiyan aati hain un ki yaadon ki

ye kis ne keh diya yaadon ka silsila kam hai

main maslahat se ta'alluq zara nahin rakhta

yahi sabab hai ki logon se rabta kam hai

hasin is liye KHud ko sabhi samajhte hain

ki apne shahr mein ai 'nur' aaina kam hai