wo KHush-kalam kabhi gyan banTta hi nahin

vo ḳhush-kalām kabhī gyaan bāñTtā hī nahīñ

ki faisla to kujā koī mashvara hī nahīñ

maiñ ḳhāk-zād tire hijr se huā sarshār

mire nasīb meñ terā visāl thā hī nahīñ

tumhārā 'ishq salāmat hai tum ko kyā mā'lūm

tumhāre saath koī hādsa huā hī nahīñ

koī du'ā bhī na maqbūl ho sakī merī

koī charāġh mirā der tak jalā hī nahīñ

bahut se log mirī khoj meñ paḌe hue haiñ

kuchh aise log mirā jin se vāsta hī nahīñ

tamāzatoñ ke sabhī karb jhel kar jaanā

charāġh hone kā matlab faqat diyā hī nahīñ

maiñ raat pichhle pahar ḳhud-kalām hotā huuñ

ye bhed vo hai jo tujh par kabhī khulā hī nahīñ

abhī ye husn kī bārish barastī rahne de

mirī nigāh kā bartan abhī bharā hī nahīñ

mukālme kā hunar mujh se chhin gayā 'jāmī'

mire vujūd meñ aisā sukūt thā hī nahīñ

wo KHush-kalam kabhi gyan banTta hi nahin

ki faisla to kuja koi mashwara hi nahin

main KHak-zad tere hijr se hua sarshaar

mere nasib mein tera visal tha hi nahin

tumhaara 'ishq salamat hai tum ko kya ma'lum

tumhaare sath koi hadsa hua hi nahin

koi du'a bhi na maqbul ho saki meri

koi charagh mera der tak jala hi nahin

bahut se log meri khoj mein paDe hue hain

kuchh aise log mera jin se wasta hi nahin

tamazaton ke sabhi karb jhel kar jaana

charagh hone ka matlab faqat diya hi nahin

main raat pichhle pahar KHud-kalam hota hun

ye bhed wo hai jo tujh par kabhi khula hi nahin

abhi ye husn ki barish barasti rahne de

meri nigah ka bartan abhi bhara hi nahin

mukalme ka hunar mujh se chhin gaya 'jami'

mere wujud mein aisa sukut tha hi nahin