pyar ho aap ka hasil to koi baat bane

pyaar ho aap kā hāsil to koī baat bane

paas aa.e jo ye manzil to koī baat bane

haath se haath kā milnā to koī baat nahīñ

dil se mil jaa.e agar dil to koī baat bane

aap tūfān-e-havādis se yuuñ ḳhā.if kyuuñ haiñ

DhūñDhiye mauj meñ sāhil to koī baat bane

yaar hī pher le nazroñ ko to jiinā kyā hai

mehrbāñ gar ho ye qātil to koī baat bane

kyā bane baat suḳhan gar ho asar se ḳhālī

dil kā ḳhuuñ fan meñ ho shāmil to koī baat bane

saaf maidāñ ho to 'e'jāz' kahāñ lutf-e-suḳhan

log hoñ madd-e-muqābil to koī baat bane

pyar ho aap ka hasil to koi baat bane

pas aae jo ye manzil to koi baat bane

hath se hath ka milna to koi baat nahin

dil se mil jae agar dil to koi baat bane

aap tufan-e-hawadis se yun KHaif kyun hain

DhunDhiye mauj mein sahil to koi baat bane

yar hi pher le nazron ko to jina kya hai

mehrban gar ho ye qatil to koi baat bane

kya bane baat suKHan gar ho asar se KHali

dil ka KHun fan mein ho shamil to koi baat bane

saf maidan ho to 'e'jaz' kahan lutf-e-suKHan

log hon madd-e-muqabil to koi baat bane