mere hi dil mein rahe aur ru-baru na hue

mire hī dil meñ rahe aur rū-barū na hue

ba-rang-e-ashk mile husn-e-chār-sū na hue

miTā ḳhayāl-e-zamān-o-makāñ ki jaise ham

tirā jamāl hue ḳhāk-e-kū-ba-kū na hue

tire firāq meñ sadiyāñ guzār diiñ haiñ magar

tumhāre jaise mile laakh hū-ba-hū na hue

ki rā.egāñ hue iblīs kā nasīb hue

vo sajde jo kisī chaukhaT kī aabrū na hue

chalā huā hai azal se hī kārvān-e-ḳhayāl

tuyūr-e-quds kabhī said-e-justujū na hue

maiñ chāk-e-hastī huuñ majnūñ kā pairahan to nahīñ

ye chaak vo haiñ azal se hī jo rafū na hue

Dubo ga.ī mujhe mastī meñ ik nigāh-e-karam

vo valvale haiñ ki jo hāsil-e-subū na hue

tire jamāl kī rangat kahāñ kahāñ na milī

ye aur baat ki ham harf-e-ārzū na hue

tumhārā zikr har ik lab pe aa chalā thā magar

ham aise kho.e ki bas vaj.h-e-guftugū na hue

tumhārī yaad meñ kā'ba banā huā hai dil

nigāh-e-shauq ke sajde bhī be-vuzū na hue

nishān-e-manzil-e-dil pūchhte ho kyā 'vāsif'

chaman ke phuul kabhī mahv-e-rang-o-bū na hue

mere hi dil mein rahe aur ru-baru na hue

ba-rang-e-ashk mile husn-e-chaar-su na hue

miTa KHayal-e-zaman-o-makan ki jaise hum

tera jamal hue KHak-e-ku-ba-ku na hue

tere firaq mein sadiyan guzar din hain magar

tumhaare jaise mile lakh hu-ba-hu na hue

ki raegan hue iblis ka nasib hue

wo sajde jo kisi chaukhaT ki aabru na hue

chala hua hai azal se hi karwan-e-KHayal

tuyur-e-quds kabhi said-e-justuju na hue

main chaak-e-hasti hun majnun ka pairahan to nahin

ye chaak wo hain azal se hi jo rafu na hue

Dubo gai mujhe masti mein ek nigah-e-karam

wo walwale hain ki jo hasil-e-subu na hue

tere jamal ki rangat kahan kahan na mili

ye aur baat ki hum harf-e-arzu na hue

tumhaara zikr har ek lab pe aa chala tha magar

hum aise khoe ki bas wajh-e-guftugu na hue

tumhaari yaad mein ka'ba bana hua hai dil

nigah-e-shauq ke sajde bhi be-wuzu na hue

nishan-e-manzil-e-dil puchhte ho kya 'wasif'

chaman ke phul kabhi mahw-e-rang-o-bu na hue