jahan-e-ishq mein ruswaiyan to hoti hain

jahān-e-'ishq meñ rusvā.iyāñ to hotī haiñ

dil-e-ġharīb se nādāniyāñ to hotī haiñ

vo be-vafā hai to kyā dījiye mubārakbād

har ek fan meñ kuchh āzādiyāñ to hotī haiñ

burā na māniye aap ek aadh bose par

visāl-rut meñ ye gustāḳhiyāñ to hotī haiñ

vo bad-gumāñ hai to samjhā.iye mohabbat se

ki do diloñ meñ ġhalat-fahmiyāñ to hotī haiñ

ye baat alag hai ki ham ne kabhī gila na kiyā

vagarna hijr meñ dushvāriyāñ to hotī haiñ

vafā-sarisht huuñ shā'ir huuñ zinda-dil bhī huuñ

har ek shaḳhs meñ kuchh ḳhāmiyāñ to hotī haiñ

vo ruuTh jaa.e to us ko manā.iye ki 'sahar'

mohabbatoñ meñ ye nārāziyāñ to hotī haiñ

jahan-e-'ishq mein ruswaiyan to hoti hain

dil-e-gharib se nadaniyan to hoti hain

wo be-wafa hai to kya dijiye mubarakbaad

har ek fan mein kuchh aazadiyan to hoti hain

bura na maniye aap ek aadh bose par

visal-rut mein ye gustaKHiyan to hoti hain

wo bad-guman hai to samjhaiye mohabbat se

ki do dilon mein ghalat-fahmiyan to hoti hain

ye baat alag hai ki hum ne kabhi gila na kiya

wagarna hijr mein dushwariyan to hoti hain

wafa-sarisht hun sha'ir hun zinda-dil bhi hun

har ek shaKHs mein kuchh KHamiyan to hoti hain

wo ruTh jae to us ko manaiye ki 'sahar'

mohabbaton mein ye naraaziyan to hoti hain